Дар соли 2023 вилояти Пензаи Русия ба Тоҷикистон ба маблағи беш аз 787 миллион рубл содирот доштааст.

Содироти маҳсулот аз вилояти Пензаи Русия ба Тоҷикистон дар соли 2024 3,5 баробар афзоиш ёфт. Дар ин бора хадамоти матбуоти ҳукумати Пенза дар пайи мулоқоти роҳбари вилоят, Олег Мелниченко бо Раҷаббой Аҳмадзода, раиси вилояти Суғди Тоҷикистон дар шаҳри Хуҷанд, хабар медиҳад.

 «Соли 2023 содироти маҳсулоти мо ба Тоҷикистон қариб 787 миллион рублро ташкил дод, ки дар семоҳаи соли 2024 ҳаҷми содирот дар муқоиса бо соли гузашта 3,5 маротиба афзоиш ёфтааст»,- гуфт дар ин мулоқот Олег Мелниченко, раиси вилояти Пенза.

Ба гуфтаи вай, вилояти Пенза ба Тоҷикистон маҳсулоти хӯрокворӣ, асбобу анҷоми рӯзгор, васоили мухобирот, зироатҳои ғалладона, равған, маҳсулоти ширӣ ва қаннодӣ содир мекунад.

Ҳамзамон, ба гуфтаи Мелниченко, ин вилоят омода аст бо Тоҷикистон дар бахши ҳамгироии саноатӣ, рушди тиҷорат, табодули илмию техникӣ, лоиҳаҳои миллӣ, фарҳангиву омӯзишӣ ва рушди сайёҳӣ ҳамкорӣ намояд. Бахусус таъкид мешавад, ки саноат ва кишоварзӣ метавонанд аз самтҳои муҳими ҳамкориҳои Тоҷикистон ва вилояти Пенза бошанд.

Дар навбати худ, раиси вилояти Суғд изҳор дошт, ки густариши ҳамкориҳои минтақавӣ ба таҳкими иқтисоди миллии ҳарду кишвар мусоидат намуда, ҳамкориҳои минтақавӣ дар ин самт нақши муҳим доранд.

Дар ин замина таъкид мешавад, ки имрӯз вилояти Суғд бо зиёда аз 60 кишвари ҷаҳон робитаҳои иқтисодӣ дорад.

Дар Суғд зиёда аз 1000 корхонаи саноатии хурду бузурги саноатӣ фаъолият дошта, 250 номгӯи маҳсулот истеҳсол ва як қисми он ба хориҷи Тоҷикистон содирот мешавад. Ҳаҷми солонаи гардиши савдои хориҷии вилояти Суғд бошад 3 миллиард долларро ташкил медиҳад.