Даври интихобии Ҷоми Осиё-2025 миёни дастаҳои мунтахаби наврасони то 17-сола ба анҷом расида, бар асоси натоиҷи он 16 дастае, ки ба қисми ниҳоии мусобиқот баромад, муайян гардид.

Дар ин бора сомонаи varzishtv.tj иттилоъ медиҳад.

Ба ҷуз аз мунтахаби наврасони Тоҷикистон, ки дар марҳилаи интихобӣ дар гурӯҳи «J» ҷойи аввалро ишғол кард, ғолибони нуҳ гурӯҳи дигар – Кореяи Шимолӣ, Афғонистон, Кореяи Ҷанубӣ, Тайланд, Узбекистон, Ҷопон, Австралия, АМА ва Яман ба қисми ниҳоии Ҷоми Осиё-2025 роҳ ёфтанд.

Панҷ даста ба марҳилаи ниҳоии Ҷоми Осиё-2025 (U-17) аз байни дастаҳое, ки бо нишондодҳои беҳтар зинаи дуюмро ишғол намуданд, роҳхат гирифтанд.

Инҳо Чин, Ветнам, Индонезия, Эрон ва Уммон мебошанд. Тими мунтахаби наврасони Арабистони Саудӣ бошад, ба ҳайси мизбон дар қисми ниҳоии Ҷоми Осиё-2025 ширкат меварзад.

Қуръакашии марҳилаи ниҳоии Ҷоми Осиё-2025 байни дастаҳои наврасони то 17-сола рӯзи 23 январ дар Арабистони Саудӣ баргузор мешавад.

Хотиррасон мекунем, дастаи мунтахаби наврасони Тоҷикистон дар марҳилаи интихобии Ҷоми Осиё-2025 тими Гуамро бо ҳисоби рекордии 33:0, дастаи мизбон - Сингапурро бо ҳисоби 3:1 ва мунтахаби Умонро бо ҳисоби 2:0 мағлуб карда, дар гуруҳи «J» бо 9 имтиёз ғолиб шуд.

Ҳамин тариқ футболбозони навраси Тоҷикистон ба марҳилаи ниҳоии Ҷоми Осиё-2025 (U-17) роҳхат гирифтанд. Мусобиқаи мазкур аз 3 то 20 апрели соли оянда дар Арабистони Саудӣ баргузор мешавад.

Дар телеграм моро пайгирӣ кунед!
https://t.me/halvaTJnews