Ҳамчун номзади ягона Арабистони Саудӣ мизбонии Ҷоми ҷаҳонии соли 2034-ро аз Федератсияи байналмилалии футбол гирифт ва ҳамин тавр бори дувум мизбонии Ҷоми ҷаҳонии футболро ба Ховари Миёна овард.

Дар Кунграи Федератсияи байнулмилалии футбол, (FIFA), ки баъд аз зӯҳри рӯзи 11 декабр дар Сюрих баргузор шуд, ба далели ҳузур надоштани номзади дигар, мизбонии Ҷоми ҷаҳонии соли 2034 аз сӯи Арабистони Саудӣ бидуни раъйдиҳӣ таъйид шуд.

Қаблан Австралия низ даъвои  ин мусобиқаро дошт, вале баъдан аз дархост барои мизбонии Ҷоми ҷаҳонии футбол дар соли 2034 даст кашид ва Арабистони Саудӣ довталаби ягона шуд.

Ба гуфтаи созмондиҳандагон, Ҷоми ҷаҳонии футбол дар Арабистони Саудӣ дар маҷмуъ дар 15 варзишгоҳи панҷ шаҳр: Риёз, Ҷидда, Абҳа, Ал-Хобар ва Неом, шаҳре, ки ҳанӯз бунёд нашудааст, баргузор мешавад.

Мусобиқа бо назардошти шароити иқлимии минтақа дар фасли зимистон баргузор мешавад. Арабистони Саудӣ барои нахустин бор дар таърихи худ мизбони Ҷоми ҷаҳонии футбол мешавад.

Намояндагони ФИФА рӯзи 11 декабр дар кунгресси ғайринавбатӣ дар Сюрих эълон карданд, мизбони Ҷоми ҷаҳонии соли 2026 ИМА, Канада ва Мексика, Ҷоми ҷаҳонии соли 2030 Испания, Португалия ва Марокаш ва Ҷоми ҷаҳонии соли 2034 Арабистони Саудӣ хоҳад буд.