Миёни футболбозони тоҷик Ятимов аз ҳама варзишгари гаронарзиш боқӣ мемонад.

Дарвозабони тими миллии Тоҷикистон, Рустам Ятимовро 1,5 миллион евро арзёбӣ карданд. Вай, ки ҳоло дар бошгоҳи “Ростов”-и Русия бозӣ мекунад, дар портали Transfermarkt 1,5 миллион евро арзёбӣ шудааст. Ин маблағ дар муқоиса бо ҳисобҳои қаблӣ 300 ҳазор евро афзудани арзиши ин бозингарро нишон медиҳад.

Рустам Ятимов, дарвозабони тими миллии Тоҷикистон, яке аз даҳ дарвозабони гаронарзиш дар Осиё буда, дар байни футболбозони тоҷик пешсаф боқӣ мемонад. Ятимов алакай дар зодгоҳаш сазовори эътироф гардида, қаҳрамони шашкаратаи Тоҷикистон ва чаҳор маротиба барандаи Ҷом ва Суперҷоми ин кишвар шудааст.

 Дар тӯли фаъолияташ дар тими миллии Тоҷикистон Ятимов 42 бозӣ анҷом дод. Номбурда қабл аз гузаштан ба тими "Ростов" аз соли 2018 дар ҳайати дастаи “Истиқлол"-и Душанбе 92 бозӣ анҷом дод, ки дар 39 бозӣ ба дарвозаи Рустам Ятимов ягон тӯб ворид нашуд.