Вазорати корҳои хориҷии Тоҷикистон зикр кард, ки ин ба тақвияти назорат дар гузаргоҳҳои марзӣ дар Русия ва Беларус вобаста аст.

Сафорати Тоҷикистон дар Маскав ба шаҳрвандони ин кишвар тавсия додааст, ки ба далели афзоиши назорат дар марзҳо аз сафар ба Русия худдорӣ кунанд.

Дар ин бора дар изҳороти намояндагии дипломатӣ гуфта мешавад.

"Бо назардошти пурзӯр намудани назорати вуруди шаҳрвандони хориҷӣ аз сарҳади давлатӣ дар гузаргоҳҳои заминӣ ва ҳавоии Русия, сафорати Тоҷикистон дар Русия тавсия медиҳад, ки шаҳрвандони Тоҷикистон муваққатан аз сафар ба Русия худдорӣ кунанд”, - омадааст дар паёми сафорат.

Моҳи апрели соли ҷорӣ Вазорати корҳои хориҷии Тоҷикистон вазъи шаҳрвандони ин кишварро дар фурудгоҳҳои Маскав душвор хонда буд.

Пас аз он Вазорати корҳои хориҷии Русия хабар дод, ки тафтиши дақиқтари афроде, ки ба қаламрави ин кишвар ворид мешаванд, муваққатӣ аст.

Дар баробари ин охири моҳи август хабар дода шуд, ки сафири Тоҷикистон дар Маскав, Давлатшоҳ Гулмаҳмадзода бо консулҳо дар Екатеринбург, Новосибирск, Санкт-Петербург, Уфа ва кормандони хадамоти консулгарии сафорат мулоқот анҷом додааст.

Дар мулоқот масоили фаъолияти кории шаҳрвандони Тоҷикистон дар Русия ва ҳамчунин “мушкилоти онҳо дар фурудгоҳҳо ва нуқтаҳои сарҳадӣ ҳангоми убур аз марзи Русия” баррасӣ шуд.

Бино ба маълумоти Вазорати меҳнат, муҳоҷират ва шуғли аҳолии Тоҷикистон, дар нимсолаи аввали соли 2024 сафари муҳоҷирони корӣ аз ин кишвар ба Русия 15% коҳиш ёфтааст.

Ҳамзамон ба иттилои ин вазорат, дар шаш моҳи аввали соли 2024 беш аз 17 ҳазор шаҳрванди Тоҷикистон ба далели нақзи қонун аз қаламрави Русия ихроҷ шудаанд.

Дар баробари ин сафорати Тоҷикистон дар Минск ҳамчунин ба шаҳрвандони ин кишвар тавсия додааст, ки ба далели пурзӯр шудани назорати марзӣ барои хориҷиён, муваққатан аз сафар ба Беларус худдорӣ намоянд.

Дар телеграм моро пайгирӣ кунед!
https://t.me/halvaTJnews