Сармураббии дастаи «Регар-ТадАЗ»-и шаҳри Турсунзода - Алиёр Ашӯрмамадов аз мақомаш истеъфо дод. Ин чорумин истеъфои сармураббӣ дар байни дастаҳои Лигаи Олӣ маҳсуб мешавад.

Тибқи иттилои вебгоҳи varzishtv.tj, дастаи футболи шаҳри Турсунзода пас аз даври 11-уми Лигаи Олӣ зери роҳбарии Ашӯрмамадов 2 ғалаба, 3 мусовӣ ва 5 шикастро ба қайд гирифта, дар поёни ҷадвали мусобиқот маскан гирифтааст.

Пас аз натиҷаҳои ғайриқаноатбахши даста бо роҳбарии мутахассиси мазкур ҷонибҳо барои қатъи қарордоди ҳамкорӣ ба мувофиқа расиданд. Ҳоло дастаи «Регар-ТадАЗ»-ро Фарҳод Холбеков, ки қаблан ёвари сармураббӣ буд, муваққатан раҳбарӣ мекунад.

Дар ҳамин ҳол, тибқи иттилои Федератсияи футболи Тоҷикистон, даври ёздаҳуми мусобиқоти қаҳрамонии Тоҷикистон-2023 байни дастаҳои Лигаи Олӣ ба анҷом расид.

Пешсафи қаҳрамонӣ тими «Истиқлол»-и Душанбе дар меҳмонӣ бар дастаи «Хатлон»-и Бохтар бо ҳисоби 3 бар 1 пирӯз шуда, бартарии худро аз таъқибкунандагони наздиктарин ба шаш имтиёз расонд.

Дастаи «Равшан»-и Кӯлоб бар «Хосилот»-и Фархор бо ҳисоби 2 бар 0 ғолиб шуда, бо 17 хол дар ҷадвали мусобиқа ба зинаи дуюм баромад. Дастаи «Эсхата»-и Хуҷанд бошад бо 16 имтиёз дар зинаи сеюм қарор гирифт.

Ин дар ҳолест, ки дастаи «Регар-ТадАЗ»-и шаҳри Турсунзода бо 9 хол дар мақоми 9 дар ҷадвали ин мусобиқа ҷой гирифтааст.