Лигаи футболи Тоҷикистон натиҷаи озмуни «Мухлиси беҳтарини соли 2024 дар Тоҷикистон»-ро ҷамъбаст карда, мухлисони фаъоли солро қадрдонӣ намуд. Маблағи умумии ҷоизаҳои озмун 100 ҳазор сомониро ташкил дод.

Дар ин бора сомонаи varzishtv.tj иттилоъ медиҳад.

Озмун миёни дӯстдорони футбол баъди мулоқоти Рустами Эмомалӣ, раиси Федератсияи футболи Тоҷикистон бо аҳли ҷомеаи футболи ин кишвар дар моҳи ноябри соли гузашта, баргузор шуд.

Рӯзи 7-уми декабр шаҳри Душанбе озмуни мазкур ҷамъбаст гардид, ки дар он мухлисони дастаҳо, инчунин ҳаводорони футбол аз рӯйи бахшҳои инфиродӣ ва махсус соҳиби мукофот шуданд.

Ҳамин тариқ, дар бахши фаъолтарин мухлисони сол, ҳаводорони дастаи «Истаравшан» ғолиб дониста шуданд.

Ба мухлисони ин тими футбол 30 ҳазор сомонӣ ҷоизапулӣ дода шуд. Ҷойи дуюм ва 25 ҳазор сомонӣ насиби мухлисони тими «Равшан»-и Кӯлоб гардид. Ҷойи сеюмро мухлисони бошгоҳи «Хуҷанд» касб карда, 15 ҳазор сомонӣ дарёфт карданд.

Ҳамчунин дастаи мухлисони «Ҳулбук» ҷоизаи махсуси Лигаи футболи Тоҷикистонро гирифт. Мухлисони тими Восеъ бошад бо 5 ҳазор сомонӣ мукофотонида шуданд.

Илова бар ин, Лигаи футболи Тоҷикистон ба мухлисони дастаҳои «Истиқлол», «Вахш», «Эсхата», «Регар-ТадАЗ», «Ҳосилот» ва «Саройкамар», ки дар озмун фаъолона ширкат варзиданд, ҷоизаҳои инфиродӣ тақдим намуд.

Мухлисони фаъоле, ки имсол дастаҳои мунтахаби Тоҷикистон ва бошгоҳҳои ин кишварро дар мусобиқоти байналмилалӣ дастгирӣ карданд, низ соҳиби ҷоизаҳо гардиданд.