Шаҳзод Сулаймонов, мудири кулли тими футболи «Истиқлол»-и шаҳри Душанбе бозгашти Игор Черевченкои рус ба вазифаи сармураббии ин дастаро тасдиқ кард.

Черевченко қаблан аз моҳи январи соли 2023 то феврали соли 2024 сармураббии “Истиқлол” буд.

“Игор Черевченко боз сармураббии дастаи мо шуд ва мо аз он шодем, ки ӯро ба клуб баргардонидем. Шартнома то охири мавсими имсола баста шудааст. Дар асоси натиҷаи бозиҳо мо тасмим мегирем, ки шартномаро бо мутахассис тамдид кунем ё на. Мо шодем, ки ӯро баргардонидем”, - гуфтааст Сулаймонов дар сӯҳбат бо хабарнигори Sport24.

Ёдовар мешавем, ки пас аз 15 бозӣ «Истиқлол» дар ҷадвали Лигаи олии футболи Тоҷикистон бо 42 имтиёз пешгом аст. Дар зинаи дуюм тими «Хуҷанд» бо 34 имтиёз мавқеъ гирифтааст.

Бояд гуфт, ки корномаи футболи Игор Черевченко соли 1992 дар тими «Помир» оғоз шудааст. Вай то соли 1994 дар ин бошгоҳ бозӣ карда, узви тими миллии Тоҷикистон буд. Пас аз кӯчидан ба Русия фаъолияти бозингарии худро дар лигаи дуюм дар ҳайати бошгоҳи «Индустри»-и Обнинск оғоз кард.

Баъдан Черевченко аз соли 1996 то 2001 дар бошгоҳи “Локомотив”-и Маскав бозӣ карда, баъдан дар “Торпедо”-и Маскав ва “Алания”-и Владикавказ бозӣ кардааст. Пас аз анҷоми фаъолияти бозингарӣ дар соли 2008 ба ҳайати мураббиёни “Локомотив” шомил шуд.

Баъд аз ин, фаъолияти ӯ дар «Балтика», «Арсенал Тула» ва «Химки» идома ёфт. Қобили зикр аст, ки Игор Черевченко аввалин барандаи Ҷоми Русия ҳам ба ҳайси бозигар (4 маротиба) ва ҳам ба ҳайси мураббӣ (1 бор)  аст.

Дар телеграм моро пайгирӣ кунед!
https://t.me/halvaTJnews