Дар Душанбе ҳамоиши роҳбарони мактабҳо ва муаллимони забони русӣ дар Тоҷикистон оғоз шуд, ки маросими ифтитоҳи он дар Китобхонаи миллии Тоҷикистон баргузор шуд. Дар ин бора хабаргузории ТАСС иттилоъ медиҳад.

Дар ин ҳамоиш ҳудуди 300 нафар омӯзгорон ва мудирони мактабҳои таҳсилоти ҳамагонӣ ва иштирокчиёни барномаи “Муаллими рус дар хориҷа” ва ҳамчунин меҳмонон аз Русия, ки барои табодули таҷриба бо ҳамкасбони тоҷик омадаанд, гирди ҳам омаданд.

"Пеш аз ҳама, ба шарофати забони русӣ, мардуми Тоҷикистон бо Русия ва Иттиҳоди Давлатҳои Мустақил робитаи ногусастанӣ доранд", - гуфт Семён Григорев, сафири Русия дар Душанбе.

Вай афзуд, ки дар солҳои ахир Русия дар тавсеаи таҳсилот бо забони русӣ дар Тоҷикистон, аз ҷумла омӯзиши амиқи фарҳанг ва анъанаҳои Русия аз сӯи ҷавонони тоҷик саҳми назаррас гузоштааст.

Дар навбати худ, Амонулло Файзуллозода, сардори Раёсати равобити хориҷии Вазорати маориф ва илми Тоҷикистон таъкид кард, ки Душанбе на танҳо ба таълиму омӯзиши забони русӣ, балки ҳифз ва тавсеаи он низ таваҷҷӯҳи хоса зоҳир мекунад.

Дар баробари ин Андрей Патрушев, раиси намояндагии "Россотрудничество" дар Душанбе гуфт: "Мо бори аввал дар Тоҷикистон чунин як ҳамоиши бузургро баргузор мекунем ва ман мехоҳам аҳамияти махсуси онро бо назардошти ҳайати иштирокчиён таъкид кунам".

Бояд гуфт, ки ҳамоиши раҳбарони мактабҳо, омӯзгорони забони русӣ ва фанҳои забони русӣ дар Тоҷикистон аз 5 то 7 ноябр баргузор мешавад.

Дар доираи ҳамоиш, мизҳои мудаввар, дарсҳои интерактивӣ ва мубоҳисаҳо баргузор мешаванд, ки дар он намояндагони Донишгоҳи дӯстии халқҳои Русия, Донишгоҳи славянии Русияву Тоҷикистон, гурӯҳи ширкатҳои «Просвешение» ва Донишкадаи татбиқи сиёсати давлатӣ ва такмили ихтисос кормандони маориф ва мактабҳои Русия бо муаллимон ва роҳбарони мактабҳои ҳамагонӣ дар Тоҷикистон сӯҳбат хоҳанд кард.

Ҳамчунин барои иштирокчиёни ҳамоиши мазкур намоиши адабиёти методии нашриёти Русия баргузор мешавад.

Дар телеграм моро пайгирӣ кунед!
https://t.me/halvaTJnews