Як масъули Вазорати тандурустӣ гуфт, ки ҳанӯз дар Тоҷикистон масъалаи эмкунии кӯдакон ба зидди коронавириус баррассӣ нагаштааст. 

Наврӯз Ҷаъфаров, сардори Раёсати амнияти санитарию эпидемиологии Вазорати тандурустӣ дар суҳбат ба “Авеста” ин матлабро баён доштаву гуфтааст, ки дар асоси талаботи Созмони Ҷаҳонии Беҳдошт, эмкунии кӯдакон танҳо замоне матраҳ мешавад, ки беш аз 60 дарсади сокинони калонсол ваксина бигиранд. 

Ин мақоми Вазорати тандурустӣ  ва ҳифзи иҷтимоии аҳолӣ хабар додааст, ки то 1-уми ноябр ҳудуди 2 миллиону 700 ҳазор нафар аз аҳолии Тоҷикистон ваксина гирифтаанд, ки ин баробар ба 46, 4 дарсад аст. 

Қаблан Вазорати тандурустӣ эълом намуда буд, ки то охири сол бояд 62,5 фисади сокинон ба ваксина фаро гирифта шаванд. 

Айни замон дар Тоҷикистон панҷ навъи ваксина аз коронавирус - CoronaVac, AstraZeneca, Moderna, Pfaizer ва "Спутник V" ба аҳолӣ пешниҳод мешавад.