Сайёҳони кӯҳгард аз Русияро дар наздикии қуллаи баландиаш 7,1 ҳазор метр дар кӯҳҳои Помири Тоҷикистон наҷот доданд.

Дар ҳоли ҳозир сайёҳони рус дар Душанбе буда, бо хешовандонашон дар тамос ҳастанд.

Дар натиҷаи амалиёти ҷустуҷӯӣ дар минтақаи қуллаи Озодӣ дар кӯҳҳои Бадахшони Тоҷикистон ду кӯҳнавард аз Русия наҷот дода шуданд. Дар ин бора сафорати Русия дар Тоҷикистон хабар дод.

Тибқи иттилои ин манбаъ, иттилоъ дар бораи нопадид шудани ду кӯҳнавард ҳангоми фатҳи қулла дар Бадахшон, рӯзи 16 август ба сафорати Русия ворид шуд.

Дар натиҷаи ҷустуҷӯ шаҳрвандони Русия пайдо ва ба пойтахти Тоҷикистон интиқол шуданд.

"Вазъияти сайёҳон хуб аст, онҳо бо хешовандонашон тамос гирифтаанд, онҳо ният доранд, ки рӯзи 21 август ба Русия парвоз кунанд", - омадааст дар хабар.

Дар ин робита сафорати Русия ба Кумитаи ҳолатҳои фавқулоддаи Тоҷикистон барои кумаки фаврӣ дар ҷустуҷӯи шаҳрвандони Русия изҳори сипос кардааст.

Бояд гуфт, ки қуллаи Озодӣ дар минтақаи Лахши Тоҷикистон воқеъ аст. То соли 2020 он қуллаи Корженевская номида мешуд. Ин қулла яке аз панҷ қуллаи Тоҷикистон аст, ки баландиаш зиёда аз 7100  метр мебошад.

Хотиррасон мекунем, ки соле қабл дар моҳи август Кумитаи ҳолатҳои фавқулоддаи Тоҷикистон гурӯҳи 13-нафарии кӯҳнавардони русро, ки ҳангоми фатҳи қуллаҳои Исмоили Сомонӣ ва Озодӣ дар кӯҳҳои Помир ҷароҳат бардоштанд, наҷот дода буд.

Дар телеграм моро пайгирӣ кунед!
https://t.me/halvaTJnews