Дар Тоҷикистон маркази зеҳни сунъӣ бо номи AI Factory кушода мешавад. Дар ин бора Шӯрои зеҳни сунъии назди Вазорати саноат ва технологияҳои нави Тоҷикистон хабар додааст.

Ин ниҳод таъкид мекунад, ки маркази мазкур ба заминаи рушди технологияҳои пешрафта ва татбиқи лоиҳаҳои инноватсионӣ дар Тоҷикистон табдил меёбад.

“Маркази нав ба барномаҳои таълимӣ, хидматрасонии машваратӣ, дастгирии фаъолияти стартапҳо ва таҳқиқоти илмӣ тамаркуз хоҳад кард. Академияи зеҳни сунъӣ курсҳои омӯзиши мошинсозӣ, биниши компютерӣ ва коркардро пешниҳод мекунад, ки имкон медиҳад мутахассисонро ҳам дар сатҳҳои заминавӣ ва ҳам олӣ омода созад”, -  мегӯянд муаллифони лоиҳа.

Илова бар ин, Марказ барои корхонаҳо созукорҳои инноватсионӣ таҳия хоҳад кард.
 
Интизор меравад, ки роҳандозии стартап ба тими ҷавонон дар тавлиди маҳсулот ва ба бозор баровардани онҳо кумак мерасонад ва таҳқиқоти дарозмуддати марказ ба таҳияи технологияҳои пешрафта, дарёфти патент ва тиҷорисозии онҳо равона карда шавад.

"Ташаббус инчунин ба таъсиси ҷойҳои корӣ, таҳияи барномаҳои таълимӣ ва дастгирии инноватсия нигаронида шудааст, ки рақобатпазирии кишварро дар арсаи байналмилалӣ ба таври қобили мулоҳиза афзоиш медиҳад", - таъкид мекунад Шӯрои зеҳни сунъӣ.

Бояд гуфт, ки татбиқи ин лоиҳа ба шарофати ҳамкорӣ бо шарикони байналмилалӣ, аз ҷумла i1 Global Capital Pte имконпазир гардид.