Муовини Вазири корҳои хориҷии Тоҷикистон Шараф Шерализода як рӯз қабл дар Вена бо Мудири кулли Дафтари СММ оид ба рушди саноат (UNIDO) ҷаноби Ли Йонг дидор намуд.

Ба иттилои Вазорати корҳои хориҷии Тоҷикистон, мулоқоти ҷонибҳо дар ҳошияи Конфронси Вена оид ба муҳоҷират дар мавзӯи “Бознигарии сиёсати муҳоҷират: чолишҳо, имконот ва стратегияҳо” сурат гирифт.

Дар рафти мулоқот, ҷонибҳо раванди татбиқи лоиҳаҳои созмони мазкурро дар қаламрави кишвар муҳокима намуда, ҳамчунин аз сатҳи ҳамкориҳо байни Тоҷикистон ва UNIDO изҳори ризоят намудаанд.

Рӯзи 19-уми октябр Шерализода дар Конфронси Вена дар доираи мавзӯи авлавиятҳои кунунӣ ва ояндаи ҷомеаи ҷаҳонӣ ҷиҳати беҳбудӣ бахшидан ба вазъият дар Афғонистон баромад намуда, мавқеи Тоҷикистонро нисбат ба вазъияти кунунӣ баррасӣ кард.