Дар заминаи мактаби "Нури Раҳмон", дар деҳаи Дӯстии ноҳияи Ашти вилояти Суғд, Маркази таҳсилоти иловагии "Россотрудничество" ифтитоҳ шуд.

Дар ин бора намояндагии "Россотрудничество" дар Тоҷикистон хабар дод.

 «Мактаби "Нури Раҳмон" сеюмин мактаб дар Тоҷикистон аст, ки дар доираи лоиҳаи "Россотрудничество" таҷҳизоти замонавии моддию техникӣ гирифт», - омадааст дар хабар.

Қаблан чунин марказҳо дар шаҳрҳои Панҷакент ва Турсунзода ба фаъолият шуруъ карда буданд.

«Мо интизорем, ки ин маркази таълимии иловагӣ ба маконе табдил меёбад, ки ҷавонони дурдасттарин гӯшаҳои шимоли Тоҷикистон имкони омӯзиши забони русиро пайдо мекунанд ва бо фарҳанги русӣ аз тариқи адабиёти нав ва инчунин таҷҳизоти муосири интерактивӣ шинос мешаванд», - гуфт Татяна Мудрова, роҳбари "Хонаи русӣ" дар Хуҷанд.

Ҳамзамон дар маркази нави таҳсилоти иловагӣ семинари омӯзгорони фанҳои дақиқ баргузор гардид, ки муҷрии он омӯзгор, иштирокчии лоиҳаи «Муаллими рус дар хориҷа» Азамат Сафаргалин буд.

«Иштирокчиён дастовардҳои муосир дар соҳаи илмҳои дақиқ, инчунин ҷорӣ намудани фановариҳои рақамӣ барои баланд бардоштани сифати дониши донишҷӯёнро баррасӣ карданд», - мегӯяд намояндагии "Россотрудничество".

Қаблан Андрей Патрушев, раиси намояндагии "Россотрудничество" дар Тоҷикистон ба ТАСС хабар дода буд, ки то охири соли ҷорӣ дар назар аст ин ниҳод дар назди мактабҳои Тоҷикистон чаҳор маркази таҳсилоти иловагӣ боз кунад, ки имкони баргузории дарсҳо дар мавзуъҳои гуногунро фароҳам меорад.

Хотиррасон мекунем, ки рӯзи 23 октябр дар доираи лоиҳаи таҷрибавии "Россотрудничество" дар Душанбе дар заминаи маркази кӯдакону наврасон аввалин маркази захиравии шакли нав «Русия бо шумост» кушода шуд, ки бо фанноварии муосир муҷаҳҳаз аст.

Қарор аст, ки дар ин марказ то охири сол барои беш аз 500 нафар кӯдакону калонсолон дарсҳои маҳорат аз фанҳои биология, физика ва робототехника баргузор шавад. Марказ метавонад дар як вақт то 40 нафарро қабул кунад.

Дар телеграм моро пайгирӣ кунед!
https://t.me/halvaTJnews