Хабарҳои асосӣ дар Тоҷикистон
Маҷлиси Ҳукумат: Дар Тоҷикистон беш аз 170 ҳазор нафар бо ҷои кор таъмин шудаанд
Нашр шуд
Дар ду соли гузашта дар доираи татбиқи Барномаи давлатии мусоидат ба шуғли аҳолӣ дар Тоҷикистон 179 ҳазору 240 нафар бо ҷойи кор таъмин шудаанд.
Ба иттилои Хадамоти матбуоти Сарвари давлат, ин матлаб дирӯз дар маҷлиси Ҳукумати Ҷумҳурии Тоҷикистон, ки таҳти раëсати Эмомалӣ Раҳмон баргузор гардид, зикр шуд.
Манбаъ мегӯяд, дар ин маҷлис нахуст Вазири меҳнат, муҳоҷират ва шуғли аҳолӣ Ширин Амонзода дар мавриди раванди иҷрои қарори Ҳукумати Тоҷикистон аз 30-уми декабри соли 2019 «Дар бораи Барномаи давлатии мусоидат ба шуғли аҳолии Ҷумҳурии Тоҷикистон барои солҳои 2020-2022» ҳисобот дод.
Амонзода аз ҷумла қайд кард, ки дар доираи татбиқи Барномаи давлатии мусоидат ба шуғли аҳолӣ, дар маҷмуъ 179 ҳазору 240 нафар бо ҷойҳои корӣ таъмин гардида, ба 32 ҳазору 358 шаҳрванд ба муддати 3 моҳ кӯмакпулӣ барои бекорӣ пардохт карда шуд.
Ҳамчунин зикр шуд, ки давоми солҳои 2020-2021 ва нимсолаи якуми соли соли 2022 ба мақомоти меҳнат ва шуғли аҳолӣ 353 ҳазору 402 нафар шаҳрванд муроҷиат намудаанд.
Ин дар ҳолест, ки бар пояи маълумоти Агентии омор, дар солҳои 2020-2021 ва семоҳаи якуми соли 2022 дар Тоҷикистон дар соҳаҳои иқтисодиёт 421 ҳазору 726 ҷои нави корӣ таъсис дода шудааст, ки аз ин 156 ҳазору 623 ҷойи кор доимӣ мебошад.
Манбаъ меафзояд, Эмомалӣ Раҳмон ба Вазорати меҳнат, муҳоҷират ва шуғли аҳолӣ супориш додааст, ки дар ҳамкорӣ бо вазорату идораҳои дахлдор, мақомоти иҷроияи ҳокимияти давлатии вилоятҳо
ва шаҳру ноҳияҳо иҷрои саривақтӣ ва пурраи нишондиҳанда ва чорабиниҳои Барномаи давлатии мусоидат ба шуғли аҳолии Ҷумҳурии Тоҷикистон барои солҳои 2020-2022-ро таъмин намоянд.
Дар маҷлиси Ҳукумати Ҷумҳурии Тоҷикистон ҳамчунин лоиҳаҳои як қатор қонунҳо муҳокима гардида, барои баррасӣ ба парлумон фиристода шудаанд.
Бояд гуфт, ки Барномаи давлатии мусоидат ба шуғли аҳолии Ҷумҳурии Тоҷикистон барои солҳои 2020-2022 як ҷузъи Стратегияи миллии рушди Ҷумҳурии Тоҷикистон барои давраи то соли 2030 буда, ба хотири дар амал татбиқ кардани сиёсати давлатии шуғли аҳолӣ ва дар ин замина таъмини суботи иҷтимоию иқтисодӣ қабул шудааст.
Хабарҳои ҷолибтарин дар телеграмм-канали Halva.tj
Маводи зиёдтарро дар гурӯҳи фейсбукии Halva.tj ва саҳифаи мо дар Instagram дарёфт намоед