Владимир Путин фармоне имзо кард, ки тибқи он муҳоҷирони ғайриқонунӣ бояд то рӯзи 30 апрел Русияро тарк кунанд.

Бар асоси фармони раисҷумҳур, Владимир Путин, ки дар пойгоҳи иттилооти ҳуқуқӣ нашр шуд, хориҷиёне, ки ғайриқонунӣ дар Русия қарор доранд, бояд то 30 апрели соли 2025 вазъи ҳуқуқии худро танзим кунанд ё худ аз ин кишвар хориҷ шаванд.

Дар ҳамин ҳол, муҳоҷирони ғайриқонунӣ, ки барои хидмати ҳарбӣ дар артиш қарордод бастаанд, аз Русия ихроҷ намешаванд. Аммо ин қоида ба хориҷиёне, ки ба амнияти миллии Русия таҳдид мекунанд, татбиқ нахоҳад шуд.

Тибқи меъёрҳои нави қонун "Дар бораи вазъи ҳуқуқии шаҳрвандони хориҷӣ дар Федератсияи Русия", аз соли 2025 хориҷиёне, ки барои будубош дар ин кишвар шароити қонунӣ надоранд, ихроҷ мешаванд. Онҳо ба феҳристи шахсони таҳти назорат шомил карда мешаванд, ки пас аз он онҳо бояд Русияро тарк кунанд ё барои зиндагӣ дар ин кишвар будубоши худро қонунӣ кунанд.

Ҳамин тариқ, аз 1 январ то 30 апрели соли 2025 шаҳрвандони хориҷӣ ва шахсони бешаҳрванд, ки маълумот дар бораи онҳо бояд ба феҳристи шахсони назоратшаванда дохил карда шавад, метавонанд вазъи ҳуқуқии худро дар Русия танзим кунанд.

Бояд гуфт, ки то моҳи октябри соли 2024 беш аз 120 ҳазор шаҳрванди Тоҷикистон ба феҳристи афроди таҳти назорати Русия шомил шудаанд.

Дар феҳрист маълумот дар бораи муҳоҷироне, ки мӯҳлати санадҳои онҳо ба охир расида ва ё бекор карда шудаанд, инчунин онҳое, ки ҳуқуқвайронкунии маъмурӣ содир намуда, бояд аз қаламрави Русия ихроҷ шаванд, ҷо карда шудааст.