Хонандагони синфҳои 11-уми мактабҳои Душанбе, ки дар давраҳои омӯзишӣ дар “Хонаи русӣ” дар равияҳои техникӣ, гуманитарӣ ва табиатшиносӣ (тиб, биология) таҳсил мекунанд, бо кормандони Донишгоҳи давлатии Тюмен мулоқот карданд.

Дар ин бора намояндагии "Россотрудничество" дар Тоҷикистон хабар дод.

Намояндагони донишгоҳ барномаҳои таълимии филология ва дигар самтҳои таълимиро муаррифӣ карданд. Гуфта мешавад, ки Донишгоҳи давлатии Тюмен аз рӯи 175 самт мутахассис омода мекунад.

Лариса Басова, устоди кафедраи забоншиносӣ ва адабиётшиносӣ ҳамчунин дастури нави таълимӣ ва методӣ, китоби “Донишгоҳи давлатии Тюмен – қаламрави муваффақият”-ро муаррифӣ кард. Ин дастури методӣ барои донишҷӯёне пешбинӣ шудааст, ки забони русиро ҳамчун забони хориҷӣ меомӯзанд.

Дар ин замина зикр мешавад, ки таҷрибаи Донишгоҳи давлатии Тюмен дар фароҳам овардани шароити мусоид барои ҳамгироии донишҷӯёни хориҷӣ ба фазои таълимии Русия ва рафъи мушкилоти академӣ ва фарҳангӣ ҷолиб аст.

Дар охири чорабинӣ дарси кушоди забони русӣ баргузор гардид, ки ба масъалаҳои душвори омӯзиши сарфу наҳви забони русӣ ҳамчун забони хориҷӣ бахшида шуд.

Бояд гуфт, ки ҳукумати Русия дар соли ҷорӣ барои донишҷӯёни Тоҷикистон як ҳазор бурсия ҷудо кардааст, ки имкони таҳсили ройгон дар донишгоҳҳои олии ин кишварро фароҳам месозад.