Вазири рушди иқтисод ва савдои Тоҷикистон аз Иттиҳодияи Байналмилалии Исломии Маблағгузории Савдо дархост кард, ки сармоягузориро барои лоиҳаҳои мухталиф дар ин кишвар бештар кунад. То кунун ин ниҳоди молиявӣ дар Тоҷикистон лоиҳаҳоро ба маблағи 182 млн доллар сармоягузорӣ кардааст.

Дар Душанбе ахиран мулоқоти Завқӣ Завқизода, вазири рушди иқтисод ва савдои Тоҷикистон бо Назим Нордалӣ, мудири амалиёти Иттиҳодияи Байналмилалии Исломии Маблағгузории Савдо (ITFC), ки бо сафари корӣ дар Тоҷикистон қарор дорад, баргузор шуд.

Тибқи иттилои ин ниҳод, Завқизода имкониятҳои зиёди сармоягузорӣ дар соҳаҳои иқтисоди Тоҷикистонро муаррифӣ намуда, аз раҳбари амалиёти Иттиҳодияи Байналмилалии Исломии Маблағгузории Савдо дархост намуд, ки ба соҳаҳои афзалиятноки иқтисоди миллӣ, аз ҷумла тақвияти иқтидори содиротии Тоҷикистон, таъсиси корхонаҳои нассоҷӣ ва истеҳсоли маҳсулоти ҳалол, бунёди нерӯгоҳҳои обӣ ва офтобӣ, марказҳои логистикӣ, рушди савдо, сайёҳӣ ва бонкдорӣ маблағгузориро зиёд намояд.

Дар навбати худ Назим Нордалӣ омодагии худро ҷиҳати сармоягузорӣ барои татбиқи лоиҳаҳо дар самтҳои зикршуда, инчунин густариши ҳамкориҳои минбаъда бо Тоҷикистон баён намуд.

Бояд гуфт, ки то имрӯз аз ҷониби Иттиҳодияи Байналмилалии Исломии Маблағгузории Савдо лоиҳаҳои сармоягузорӣ ба маблағи 182 млн доллар дар Тоҷикистон татбиқ шуда, айни замон 3 лоиҳа ба маблағи 18 млн доллар амалӣ мегардад.

Гуфтанист, ITFC як созмони мустақил дар ҳайати гурӯҳи Бонки Исломии Рушд аст.

Ин созмон бо ҳадафи пешбурд ва тавсеаи тиҷорат ба манзури беҳбуди шароити иқтисодӣ ва даромади мардуми кишварҳои ҷаҳони ислом таъсис шудааст.

Дар телеграм моро пайгирӣ кунед!
https://t.me/halvaTJnews