Вазоратҳои корҳои дохилии Тоҷикистон ва Русия пас аз гаравгонгирии террористҳо дар маҳбаси вилояти Волгоград барои муайян намудани ҳаммаслакони онҳо ҳамкорӣ мекунанд.

Мақомоти ду кишвар фаъолияти муштараки ҷустуҷӯӣ ва тафтишотӣ мегузаронанд.

Рамазон Раҳимзода, вазири корҳои дохилии Тоҷикистон бо Владимир Колоколтсев, вазири корҳои дохилии Русия суҳбати телефонӣ анҷом дода, ду ҷониб ба мувофиқа расиданд, ки пас аз гаравгонгирӣ дар маҳбаси вилояти Волгоград, чорабиниҳои муштараки ҷустуҷӯӣ ҷиҳати муайян намудани аъзои дигари созмони террористӣ анҷом медиҳанд. Дар ин бора Вазорати корҳои дохилии Тоҷикистон хабар медиҳад.

«Дар рафти суҳбат ҷонибҳо ба мувофиқа расиданд, ки ҷиҳати муайян ва боздошти аъзои дигари ташкилоти террористӣ, ки ин ҷиноятро содир кардаанд, фавран чораҳои зарурӣ андешида, чорабиниҳои муштараки фаврӣ-ҷустуҷӯӣ гузаронанд», - омадааст дар хабар.

Дар хабар гуфта мешавад, ки Эмомалӣ Раҳмон, раисҷумҳури Тоҷикистон, барои анҷоми гуфтугӯи телефонӣ ба вазири умури дохилии кишвараш дастур додааст.

Хотиррасон мекунем, ки баъд аз зуҳури рӯзи 23 август чаҳор маҳкумшуда ҳашт корманди маҳбас ва чаҳор маҳбусро дар вилояти Волгогради Русия гаравгон гирифтанд.

Ҷинояткорон чаҳор корманди маҳбасро бо корд захмӣ карданд, ки се нафари онҳо ба ҳалокат расидаанд. Инчунин чор нозири дигари маҳбас дар бемористон бистарӣ шуда, як нафари онҳо баъдан ҷон бохт.

Дар баробари ин дар пайи ин ҳодиса чор нафар маҳкумшудагон низ зарар диданд. Дар натиҷаи як амалиёти вижа барои раҳоии гаравгонҳо аз ҷониби кормандони Хадамоти федеролии иҷрои ҷазои Русия дар вилояти Волгоград ва Горди миллӣ ҳамаи чаҳор ҷинояткор аз байн бурда шуданд.

Қаблан хабар дода шуда буд, ки се нафар аз ҷинояткорон барои қочоқи маводи мухаддир ва як нафари дигар барои куштори одам дар занозанӣ маҳкум шуда буданд.

Ду нафари онҳо зодаи Тоҷикистон ва ду нафари дигар аз Узбекистон будаанд. Дар ҳамин ҳол гуфта мешавад, ки муҳлати ҷазои яке аз ҷинояткорон моҳи ноябри соли 2024 ба охир мерасид.

Дар телеграм моро пайгирӣ кунед!
https://t.me/halvaTJnews