Аз ҷониби намояндагии «Россотрудничество» дар Тоҷикистон ба Мактаб-интернати ҷумҳуриявии кӯдакони ятими ноҳияи Шаҳринав 300 номгӯй адабиёти бачагонаи русӣ ва теъдоди зиёди барномаву дастурамалҳои омӯзиши забони русӣ тақдим гардид.

Дар ин хусус мақомоти ҳукумати ноҳияи Шаҳринав хабар медиҳад.

Маҷмӯае, ки аз шоҳасарҳои адабиёти бачагона иборат аст, китобхонаи мактаб-интернати ҷумҳуриявии кӯдакони ятими ноҳияи Шаҳринави Тоҷикистонро пурра кард. Дар ин иқдом 300 номгӯи китоби бачагона бо забони русӣ аз сӯи Андрей Патрушев, раиси намояндагии "Россотрудничество" дар Тоҷикистон ба ин муассисаи таълимӣ тақдим шуд.

Зимни супоридани адабиёти бачагона Андрей Патрушев гуфт, ки ҳадафи онҳо ба роҳ мондани ҳамкории байналмилалӣ дар самти гуманитарӣ буда, мақсад аз он ҳифзу рушди забони русӣ мебошад.

 «Умедворам, ки шумо аз ин китобҳои олиҷаноб дониши нав мегиред ва чизи хубу нек меомӯзед. Суханони хирадмандонае, ки муаллифон дар асарҳои худ баён кардаанд, ба шумо кумак мекунад, ки роҳи хоси зиндагиро пайдо кунед, ки шуморо ба сӯи хушбахтӣ мебарад", - гуфт Патрушев.

Ҳамзамон барои омодасозӣ ва дар оянда таҳсил намудани хонандагони ин мактаб-интернат дар донишгоҳу донишкадаҳои Русия байни намояндагии «Россотрудничество» ва мактаб-интернат шартномаи ҳамкорӣ имзо шуд.

Бояд гуфт, ки мактаб-интернат барои кӯдакони ятим дар ноҳияи Шаҳринав 97 сол қабл кушода шуда, айни замон дар ин муассисаи таълимӣ 185 нафар бачагон тарбия меёбанд.

Дар телеграм моро пайгирӣ кунед!
https://t.me/halvaTJnews