Татбиқи Барномаи ғизои мактабӣ дар Тоҷикистон аз сӯи Созмони Милали Муттаҳид бо маблағгузории ҳукумати Русия идома дорад.

Кордори сафорати Русия дар Тоҷикистон, Вера Хуторская маҳмулаи навбатии кумакҳои ғизоиро, ки ахиран ба Тоҷикистон интиқол шуд, аз назар гузаронд. Дар ин бора сафорати Русия дар Тоҷикистон хабар дод.

Бояд гуфт, ки Барномаи ғизои мактабӣ бузургтарин лоиҳаи Созмони ҷаҳонии озуқаи СММ дар Тоҷикистон аст, ки аз соли 2013 аз ҷониби ҳукумати Федератсияи Русия маблағгузорӣ мешавад.

Хотиррасон мекунем, ки дар доираи ин барнома моҳи июли соли ҷорӣ ба Вазорати маориф ва илми Тоҷикистон, 678 тонна орди гандуми витаминдор, 147 тонна равгани офтобпараст ва 150 тонна нахуд кумаки ғизоӣ таҳвил шуд.

Ҳамчунин дар моҳи августи соли ҷорӣ Русия барои ташкили ғизо дар мактабҳо ба вилояти Суғди Тоҷикистон беш аз 1,2 ҳазор тонна орди ғанишуда тақдим кард.

Гуфтанист, дар доираи Барномаи ғизои мактабӣ ҳудуди 450 ҳазор хонандагони синфҳои 1-4 дар беш аз 2 ҳазор мактаб дар 53 шаҳру ноҳияи Тоҷикистон ба таври доимӣ бо хӯроки гарми серғизо таъмин карда мешаванд.