Интизор аст, ки сохтмони муассисаҳои таҳсилоти умумӣ дар Тоҷикистон тақрибан то соли 2030 ба анҷом расад. Дар ин бора Sputnik Тоҷикистон бо такя ба манбаъҳои худ иттилоъ медиҳад.

Русия ва Тоҷикистон сохтмони боз панҷ мактаби русӣ-тоҷикӣ дар Тоҷикистонро баррасӣ доранд. Гуфта мешавад, ки ин мактабҳо дар мисоли панҷ мактаби мушобеҳ дар шаҳрҳои бузурги Тоҷикистон ба истифода дода мешаванд.

Ба гуфтаи манобеи Sputnik Тоҷикистон, бунёди ин муассисаҳои таълимӣ танҳо идомаи ин иқдом хоҳад буд.

«Дар мавриди сохтмони 5 мактаби дигар аз ҳисоби ҷониби Русия то соли 2030 гуфтушунид идома дорад, ки дар он 5 ҳазор хонандаи дигар таҳсил хоҳанд кард», - гуфт манбаъ.

Хотиррасон мекунем, ки қаблан бо сармоягузории давлати Русия дар шаҳрҳои Душанбе, Хуҷанд, Кӯлоб, Бохтар ва Турсунзода панҷ мактаб сохта ба истифода дода шуда буд. Ҳоло дар ин мактабҳо 5,7 ҳазор хонанда таҳсил мекунанд.

Мактабҳои мазкурро 1 сентябри соли 2022 раисони ҷумҳури Тоҷикистону Русия - Эмомалӣ Раҳмон ва Владимир Путин ифтитоҳ карданд. Русия барои сохтмони панҷ мактаб дар Тоҷикистон наздики 150 миллион доллар сармоягузорӣ кард.

Аз сӯи дигар сафорати Русия дар Тоҷикистон қаблан хабар дода буд, ки имсол дар Душанбе сохтмони Маркази кӯдакони лаёқатманд, монанди мактаби “Сириус” дар Русия, оғоз мешавад.

Дар телеграм моро пайгирӣ кунед!
https://t.me/halvaTJnews