Эмомалӣ Раҳмон дар ҳошияи сафари корӣ ба Фаронса бо Шоҳзода Раҳим Оғохон дар шаҳри Париж мулоқот анҷом дод.

Ба иттилои Шабакаи Рушди Оғохон, Шоҳзода Раҳим Оғохон дар чорабинии тантанавӣ бахшида ба 30 - юмин солгарди Истиқлолияти давлатии Ҷумҳурии Тоҷикистон, ки дар бинои Қасри ЮНЕСКО баргузор гардид, ширкат варзид.

Ба шарҳи манбаъ, Шоҳзода Раҳим ҳангоми вохӯрӣ таманниёти нек ва самимии Волоҳазрат Оғохони IV- ро бахшида ба таҷлили 30- солагии Истиқлолияти давлатии Тоҷикистон ба сарвари давлат Эмомалӣ Раҳмон расонд.

Зикр мегардад, ки дар доираи дидор, ҷонибҳо дар атрофи масъалаи ҳамкорӣ ва дастовардҳои шабакаи Оғохон дар Ҷумҳурии Тоҷикистон мубодилаи афкор намуданд.

Илова гардид, ки AKDN дар Тоҷикистон ҷиҳати беҳтар шудани сифати зиндагии ҳамаи мардуми тоҷик лоиҳаҳои гугогунро дар бахшҳои мухталифи иқтисодӣ, иҷтимоӣ, гуманитарӣ ва фарҳангӣ маблағгузорӣ менамояд.

Шабакаи Рушди Оғохон дар Тоҷикистон аз соли 1992 то инҷониб фаъолият дошта, дар аксари шаҳру ноҳияҳои кишвар намояндагии худро дорад.