Раисҷумҳури Қирғизистон, Содир Ҷабборов қонунеро имзо кард, ки бар асоси он аз 1 июли соли 2025 воридот, муомилот ва истифодаи сигорҳои электронӣ дар қаламрави ин кишвар мамнуъ аст. Дар ин бора сомонаи расмии раҳбари Қирғизистон хабар дод.

Гуфта мешавад, ки ҳадаф аз ин қонун ҳифзи саломатӣ ва некӯаҳволии шаҳрвандон аз истифодаи сигорҳои электронӣ бо моеи никотиндор мебошад.

Ин қонун ҳамчунин ворид кардани тағйирот ба Кодексҳои маъмурӣ ва ҷиноии Қирғизистонро пешбинӣ мекунад, ки муҷозот барои таҳвил ва фурӯши сигори электрониро муқаррар мекунад.

Ҳамин тариқ, барои истифода аз сигорҳои электронӣ афроди воқеӣ ба маблағи 100 нишондиҳандаи ҳисобӣ ($115) ва ширкатҳо - 600 ($693) нишондиҳанда барои ҳисобҳо ҷаримабандӣ мешаванд. Ҷаримаи пулӣ барои фурӯши ин маҳсулот барои шаҳрвандон 20 ҳазор сом (231 доллар), барои шахсони ҳуқуқӣ 65 ҳазор сом (751 доллар) пешбинӣ шудааст.

Дар баробари ин, барои воридоти ғайриқонунии сигорҳои электронӣ ҷавобгарии ҷиноятӣ муқаррар шудааст.

Дар ин ҳолат муҷозот дар намуди корҳои ислоҳӣ ба муҳлати аз ду моҳ то як сол ё ҷарима аз 100 ҳазор ($1156) то 120 ҳазор сом ($1387) пешбинӣ гардидааст.

Барои ҳамин кирдор, ки агар дар ҳаҷми махсусан калон содир шудааст, ба ҷинояткор ҷаримаи пулӣ ба андозаи то 200 ҳазор сом ($2312) ё маҳрумият аз озодӣ аз як то ду сол бо манъи машғул шудан бо фаъолияти муайян пешбинӣ мешавад.