Дар соли нави таҳсил муаллимони бештар аз Русия ба Тоҷикистон хоҳанд омад. Имсол дар мактабҳои Тоҷикистон 76 омӯзгор аз Русия дарс гуфтанд.

Теъдоди омӯзгороне, ки дар мактабҳои Тоҷикистон дар чаҳорчӯби тарҳи “Муаллими рус дар хориҷа” дар соли нави таҳсил дарс мегӯянд, аз 100 нафар бештар мешавад.

Дар ин бора ба хабарнигорон муовини аввали вазири маориф ва илми Тоҷикистон, Ҷамшед Ҷӯразода хабар дод.

«Имсол 76 нафар омӯзгор аз Русия кори худро дар Тоҷикистон ба анҷом расониданд. Дар соли хониши 2024-2025 дар назар аст, ки аз Русия барои кор ба Тоҷикистон боз беш аз 100 нафар омӯзгор меояд», - гуфт Ҷӯразода.

Вай афзуд, ки дар доираи лоиҳаи «Муаллими рус дар хориҷа» ҳар сол ба Тоҷикистон муаллимон аз Русия меоянд. Муовини вазир тавзеҳ дод, ки илова бар ин дар панҷ мактабҳои русие, ки дар Тоҷикистон сохта шудаанд, беш аз 50 дарсади омӯзгорон аз Русия ҳастанд.

Лоиҳаи байналмилалии башардӯстонаи «Муаллими рус дар хориҷа» аз ҷониби Вазорати маорифи Русия дар якҷоягӣ бо сохторҳои миллии дахлдори кишварҳои шарик, аз ҷумла Тоҷикистон амалӣ мешавад.

То соли 2023 теъдоди омӯзгорони рус дар мактабҳои Тоҷикистон 47 нафар буд.

Илова бар ин, дар соли 2022 дар шаҳрҳои Душанбе, Хуҷанд, Кӯлоб, Бохтар ва Турсунзода аз ҷониби ҳукумати Русия дар чаҳорчӯби созишномаи байниҳукуматӣ бо Тоҷикистон, панҷ мактаби русӣ бунёд шуд.

Дар телеграм моро пайгирӣ кунед!
https://t.me/halvaTJnews