Шералӣ Кабир, вазири саноат ва технологияҳои нави Тоҷикистон ва Антон Алихонов, вазири саноат ва тиҷорати Русия дар мавриди рушди ҳамкориҳои саноатӣ ва логистикӣ ба мувофиқа расиданд.

Дар ин бора Вазорати саноати Тоҷикистон дар пайи нишасти вазирон дар ҳошияи намоишгоҳи саноатии «Иннопром» дар Екатеринбург хабар дод.

“Тарафҳо дар бораи дурнамои барқарорсозии робитаҳои саноатӣ ва бунёди занҷираҳои нави истеҳсолӣ, ки барои рушди иқтисодӣ ва некӯаҳволии аҳолӣ аҳамияти калидӣ доранд, табодули афкор намуданд”, - омадааст дар иттилоия.

Манбаъ афзуд, ки ба масъалаҳои ҳамгироии саноатӣ ва таҳияи лоиҳаҳои шарикӣ дар соҳаҳои мухталиф, аз ҷумла саноати кӯҳӣ ва нассоҷӣ таваҷҷуҳи хоса зоҳир карда шуд.
 
Шералӣ Кабир ва Антон Алихонов ҳамчунин ба аҳамияти рушди маркази нақлиётию логистикӣ, ки шароити тиҷорат ва табодули маҳсулотро ба таври қобили мулоҳиза беҳтар мекунад, таъкид карданд. 

«Ҳарду ҷониб омодагии худро барои идомаи ҳамкориҳои судманд ва амалӣ намудани ташаббусҳои нав, ки ба таҳкими робитаҳои иқтисодӣ нигаронида шудаанд, изҳор доштанд», - гуфта мешавад дар изҳорот.

Гуфтанист, рӯзҳои 8-11 июл дар Екатеринбург Намоишгоҳи байналмилалии саноатии «Иннопром» ҷараён дорад. Тоҷикистонро дар ин намоишгоҳ як ҳайати ҳукуматӣ таҳти сарварии сарвазир Қоҳир Расулзода намояндагӣ мекунад ва дар ин макон ғурфаи Тоҷикистон низ мавҷуд аст, ки дар он беш аз 40 ширкат маҳсулоти худро ба намоиш гузоштаанд.
 
Қоҳир Расулзода қаблан дар ҷаласаи стратегии намоишгоҳ суханронӣ карда, ҳамчунин бо сарвазири Русия, Михаил Мишустин мулоқот дошт.

Дар телеграм моро пайгирӣ кунед!
https://t.me/halvaTJnews