Дастаи мунтахаби Тоҷикистон таҳти роҳбарии мутахассиси хорватӣ Петр Сегрт рӯзи 22-юми март барои баргузории бозии дӯстона бо тими Имороти Муттаҳидаи Арабӣ вориди Абу-Забӣ шуд. Дар ин бора Федератсияи футболи Тоҷикистон хабар дод.

Гуфта мешавад, ки ба ҳайати тими миллии Тоҷикистон 24 бозигар – 3 дарвозабон, 9 ҳимоятгар, 8 нимҳимоятгар ва 4 ҳамлавар шомиланд.

Ба навиштаи ин манбаъ, баъди расидан ба Абу-Забӣ футболбозони тоҷик дар меҳмонхонаи панҷситорадори «Гранд Миллениум ал-Ваҳда» ҷойгир шуданд. Дастпарварони Петр Сегрт пас аз истироҳати кӯтоҳ шоми дирӯз машқу тамринро шурӯъ карданд.

Қобили зикр аст, ки бозии дӯстона миёни дастаҳои мунтахаби Имороти Муттаҳидаи Арабӣ ва Тоҷикистон шоми рӯзи 25-уми март дар варзишгоҳи «Ал-Наҳаён»-и Абу-Забӣ доир мешавад.