Кумаки молиро Бонки давлатии рушди Чин ба Бонки миллии Тоҷикистон бо арзи юан интиқол хоҳад дод.

Ҳукумати Тоҷикистон барои иҷрои тарҳҳои мухталиф аз давлати Чин 300 миллион юан (ҳудуди 40,7 миллион доллар) дар шакли кумак дарёфт хоҳад кард. Дар ин бора дар тарҳи созишномае, ки дар Пойгоҳи иттилооти ҳуқуқии Тоҷикистон нашр шудааст, зикр мешавад. Дар ин бора хабаргузории ТАСС иттилоъ дод.

Тибқи ин санад, лоиҳаи мазкур аз ҷониби ҳукумати Тоҷикистон тасдиқ шудааст. Дар он ҳамчунин зикр мегардад, ки кумак "бо дархости ҳукумати Ҷумҳурии Тоҷикистон» расонида мешавад ва лоиҳаҳое, ки аз ин маблағ маблағгузорӣ мешаванд, бо созишномаи иловагӣ мувофиқа карда мешаванд".

Маблағҳо, тибқи ин санад, бояд аз ҷониби Бонки давлатии рушди Чин ба Бонки миллии Тоҷикистон бо юан интиқол дода шаванд.

«Ҳангоми истифодаи маблағҳои кумаки молиявӣ бояд тибқи тартиб ва қоидаҳои дахлдори ҷамъияти саҳомии Бонки давлатии рушди Чин баҳисобгирии муҳосибӣ пеш бурда, дар бораи вазъи ҳисобҳо мунтазам ба ҳукуматҳои ду кишвар ҳисобот пешниҳод карда шавад », - гуфта мешавад дар санад.

Дафтари матбуоти раисҷумҳури Тоҷикистон, Эмомалӣ Раҳмон рӯзи 5 июл дар ҷараёни сафари расмии Си Ҷинпин, раиси ҷумҳурии Чин ба Душанбе аз имзои созишнома дар бораи ироаи кумаки молӣ хабар дод. Аммо он замон тафсилоти ин тафоҳумнома пешниҳод нашуд.

Бино ба маълумоти Оҷонсии омори Тоҷикистон, дар нимсолаи аввали соли 2024 Чин дар интиқоли кумакҳои башардӯстона ба Тоҷикистон пешсаф шуд.

Дар ин муддат Тоҷикистон аз кишварҳои хориҷӣ ба маблағи беш аз 79 миллион доллар кумакҳои башардӯстона гирифтаст, ки 38,2% ин ба Чин рост меояд.
Бояд гуфт, ки Чин инчунин ба Тоҷикистон барои лоиҳаҳои зерсохтӣ мунтазам кумаки молӣ мерасонад. Аз ҷумла, дар ҷараёни сафари Си Ҷинпин дар Душанбе биноҳои нави ҳукумат ва парлумони Тоҷикистон, ки бо кумаки молии Чин сохта шудаанд, ифтитоҳ гардид.

Дар телеграм моро пайгирӣ кунед!
https://t.me/halvaTJnews