Ҳиссаи муомилоти молии Тоҷикистон бо кишварҳои ИДМ бо рубли русӣ қариб ба 60% расидааст. Ҳаҷми пардохтҳо бо доллар бошад коҳиш меёбад, гуфт Фирдавс Толибзода, раиси Бонки миллии Тоҷикистон.

Ба гуфтаи Толибзода, Бонки миллии Тоҷикистон тамоюли афзоиши ҳаҷми ҳисоббаробаркуниҳо бо рублро бо кишварҳои аъзои Иттиҳоди Давлатҳои Мустақил (ИДМ) мушоҳида мекунад, ки ҳиссаи чунин муомилот қариб ба 60% расидааст.

Вай дар идома афзуд, ки ҳаҷми пардохтҳо дар тиҷорати хориҷии Тоҷикистон бо доллар коҳиш меёбад.

«Қобили зикр аст, ки вақтҳои охир тамоюли коҳиши пардохтҳо бо доллар байни шарикони тиҷоратии ИДМ мушоҳида мешавад, агар қаблан беш аз 60% пардохтҳо бо доллар сурат гирифта бошанд, дар охири моҳи июни соли 2024 ин баръакс буд, қариб 60 % пардохтҳо бо рубли русӣ сурат гирифтаанд», - гуфт раиси Бонки миллии Тоҷикистон дар нишасти матбуотии ин ниҳод.

Толибзода қайд кард, ки тақрибан 36%-и муомилоти молӣ бо кишварҳои хориҷӣ бо доллар сурат мегирад.

Бояд гуфт, моҳи феврали соли ҷорӣ намояндаи доимии Русия дар ниҳодҳои ИДМ Андрей Грозов хабар дод, ки ҳиссаи ҳисоббаробаркуниҳо бо асъори миллӣ дар соли 2023 миёни кишварҳои ин созмон беш аз 85 дарсадро ташкил медиҳад. 
 
Вай таъкид кард, ки беш аз 80 дарсади муомилоти содироту воридот дар доираи ИДМ ба рубли русӣ рост меояд. 

Дар телеграм моро пайгирӣ кунед!
https://t.me/halvaTJnews