Тоҷирони қазоқ, ширкатҳои бузург ва бунёдҳои хайрия барои кумак ба минтақаҳои аз обхезиҳо зарардида 250,5 миллиард танга, муодили 536 миллион доллар ҷудо карданд.

Дар бора Қанат Бозумбоев, муовини раиси ҳукумати Қазоқистон эълон кард, хабар медиҳад Kazinform.

Гуфта мешавад, ки аз ҳама бештар кумаки молӣ барои сокинони вилоятҳои Қазоқистони ғарбӣ ва Қазоқистони шимолӣ ҷамъ карда шудааст.

Бояд гуфт, ки баҳори имсол дар Қазоқистон обхезии бузург ба амал омад, ки дар тӯли беш аз 80 сол собиқа надошт.

Дар пайи обхезӣ чанд минтақаи Қазоқистон зери об монда, ҳазорон шаҳрванд маҷбур шуданд, ки маҳали зисти худро тарк кунанд. То имрӯз беш аз 67 ҳазор нафар ба хонаҳои худ баргашта, 3,6 ҳазор нафар сокинон дар нуқтаҳои зисти муваққатӣ боқӣ мемонанд.

Дар маҷмуъ, аз оғози обхезӣ  дар Қазоқистон 12 ҳазор бинои истиқоматӣ ва 7,3 ҳазор хонаҳои тобистона, ки ягона манзили осебдидагон буданд, зери об мондаанд.  Тибқи арзёбии вазъи биноҳои зери об монда, беш аз 9 ҳазори онҳоро мешавад таъмир кард, аммо 8 ҳазор манзили истиқоматии дигарро барқарор кардан имконнопазир аст.

Қарор аст, ки барои осебдидагони обхезӣ 5,7 ҳазор хона харидорӣ карда, инчунин 2,5 ҳазор хонаи дигарро бунёд кунанд, хабар медиҳад хадамоти матбуоти ҳукумати Қазоқистон.
Дар маҷмуъ, барои барқарорсозии манзили осебдидагони обхезӣ дар Қазоқистон тақрибан 257 миллиард танга (550 миллион доллар) лозим аст.

Хотиррасон мекунем, ки аввали апрели соли ҷорӣ  Қосим Ҷомарт Тоқаев, раисҷумҳури Қазоқистон аз соҳибкорони маҳаллӣ даъват кард, ки ба шаҳрвандони аз обхезӣ осебдидаи ин кишвар кумак кунанд. 

Дар телеграм моро пайгирӣ кунед!
https://t.me/halvaTJnews