Толибон* (*Ҳаракати террористӣ) пахши барномаҳои телевизионии “Би-би-сӣ” ва “Садои Амрико”-ро дар Афғонистон тавассути расонаҳои маҳаллӣ манъ кардаанд.

Бахши паштуи “Би-би-сӣ” мегӯяд, барномаи расонаӣ, ки ба забони пашту дар шабакаи телевизионии “Шамшод” пахш мешуд, шоми якшанбе пахш нашуд.

Бахши дарии “Садои Амрико” ҳамчунин гузориш медиҳад, ки пахши барномаҳои "Ашна ТВ"-и ин шабака аз тариқи телевизони “Тулӯь”,  ки қаблан беш аз даҳ сол дар телевизиони миллии Афғонистон пахш мешуд, аз тарафи Толибон қатъ шудааст.

Ба гузориши “Би-би-сӣ”, дар рӯзҳои ахир барномаҳои телевизиони тоҷикӣ ва ӯзбекии “Би-би-сӣ” дар Афғонистон, ки аз тариқи каналҳои “Ориёно” ва “Орзу” пахш мешуданд, низ баста шудаанд.

Манобеи мухталифи Толибон ба “Би-би-сӣ” гуфтаанд, ки ин тасмимро роҳбарияти онҳо гирифтаанд. Аммо ин манобеъ сабабҳои тасмими мазкурро шарҳ надодааст.

Ториқ Кафоллаҳ, Раиси бахши ҷаҳонии “Би-би-сӣ” гуфт: "Ин як тасмими нигаронкунанда барои мардуми Афғонистон дар замони номуайянӣ ва бӯҳрон аст."

“Садои Амрико” ҳамчунин тасмими Толибон дар бораи қатъи пахши барномаҳои телевизионӣ дар Афғонистонро маҳкум кард ва хостори бознигарӣ шуд.