Паҳлавонони Тоҷикистон дар Абузабӣ як медали нуқра ва ду биринҷӣ касб карданд.

 Мусобиқаи байналмилалии ҷудо “Abu Dhabi Grand Slam 2024” рӯзҳои 11-13  октябр дар шаҳри Абузабӣ баргузор шуд.

Дар ин мусобиқаи ҷаҳонӣ паҳлавони тоҷик Абубакр Шеров дар вазни то 73 кило баъди чаҳор пирӯзӣ ба рақибонаш аз Молдова, Гурҷистон, Русия ва Ҷопон ба финал баромад.

Дар ин марҳила Абубакри 21-сола дар даври ниҳоӣ аз Маҳмадбек Маҳмадбеков, намояндаи Имороти Муттаҳидаи Арабӣ, мағлуб шуд.

Дар рӯзи аввали мусобиқаи “Abu Dhabi Grand Slam 2024” ҷудокори дигари Тоҷикистон, Обид Ҷебов дар вазни то 66 кг барандаи медали биринҷӣ гардид.

Дар рӯзи охирини мусобиқаи “Abu Dhabi Grand Slam 2024” паҳлавони Тоҷикистон Ҷаҳонгир Маҷидов дар вазни то 100 кило баъди чанд сабқат соҳиби медали биринҷӣ шуд.

Ҷудокорони дигари Тоҷикистон Умедҷон Раҷабов дар вазни то 90 кило мақоми ҳафтумро касб намуд. Ду нафари дигар аз варзишгарони Тоҷикистон Беҳрӯзи Хоҷазода дар вазни то 73 кило ва Муҳаммадҷон Абдуҷалилзода дар вазни то 90 кило дар даври аввал ноком шуда, аз ҳаққи идомаи мубориза маҳрум гаштанд.

Бояд гуфт, ки дар ин мусобиқаи бо мақоми "Grand Slam" 219 варзишгар (150 мард ва 69 зан) аз 29 кишвари чаҳор қитъаи олам иштирок карданд.

Маблағи умумии ҷоизаҳои молии мусобиқа 154 ҳазор евро буд. Барои медали тило 5000 евро, медали нуқра 3000 евро ва ба соҳибони медали биринҷӣ 1500 евро тақдим гардид.

Ҳамчунин, варзишгарон барои беҳтар кардани мавқеашон дар феҳристи ҷаҳонӣ соҳиби имтиёзҳо шуданд. Ғолибони мусобиқа 1000 имтиёз, барандагони ҷойи дуюм 700 имтиёз, ҷойи сеюм 500 имтиёз гирифтанд.

Дар телеграм моро пайгирӣ кунед!
https://t.me/halvaTJnews