Нархи Ҳаҷи фарзӣ дар Тоҷикистон чанд аст?

Ширкати ҳавопаймоии «Сомон Эйр» аз оғози парвозҳои мустақим ба шаҳри Ҷиддаи Арабистони Саудӣ иттилоъ дод. Ба иттилои дафтари матбуотии ин ниҳод, парвози нахустин рӯзи 9-уми март аз шаҳри Душанбе анҷом дода шуд. Инчунин аз шаҳри Хуҷанд низ парвозҳо анҷом дода мешаванд. 

Оё баъди ба роҳ мондани парвозҳои мустақим нархи Ҳаҷи фарзӣ барои зоирони тоҷик арзон мешавад? Ин суолест, ки баъд аз чанд моҳ метавон ба он посух пайдо намуд. Чун то ҳол нархи Ҳаҷ барои соли 2023 муайян нашудааст. Вале квота барои аксар кишварҳо назар ба соли қаблӣ ду маротиба зиёд гардидааст. 

«Дар чанд соли охир зоирони Тоҷикистон дар мавсими Ҳаҷ дар меҳмонхонаҳое иқомат мекунанд, ки то Масҷидулҳарам ҳамагӣ 1 км масофа доранд. Аз чунин меҳмонхонаҳо тақрибан ҳеч яке аз шаҳрвандони ҳамсоякишварҳои мо истифода намекунанд.  Агар нархи Ҳаҷи Тоҷикистон ба фарқ аз Қирғизистон гаронтар аст, пас бешак аз ҳисоби сифати хидматрасониҳост», - мегӯяд сухангӯйи Кумитаи дини Тоҷикистон. 

Бояд гуфт, нархи ҳаҷ бо доллар муқоиса карда шудааст. 

Квотаҳои ҷудогардида то куҷо метавонанд талаботи ҳоҷиёни тоҷикро конеъ карда бошанд? Оё ин миқдор квота басанда аст ё не?

Ба гуфтаи Афшин Муқим, квота барои ҳар шаҳру ноҳия аз рӯйи шумораи аҳолӣ тақсим карда мешавад.

- Ҳастанд шаҳру ноҳияе, ки ҳамон ҳиссаи барояшон ҷудошударо масраф намекунанд. Боз ҳастанд шаҳру навоҳие, ки ин ҳиссаи ҷудошуда барояшон камӣ мекунад. Талабот ба квота яксон набуда, он метавонад ҳамасола тағйир ёбад, - афзуд ӯ.