«Калмарбозӣ» ба қатори филмҳои сербинандатарини Netflix шомил гардид

Нашр шуд 20.10.2021

Силсилафилми «Калмарбозӣ», ки аз ҷониби коргардонҳои Кореяи Ҷанубӣ рӯи навор омадааст, дар раддабандии ҷаҳонии Netflix ҷойи аввалро соҳиб гашт. Аввалин намоиши филми мазкур 17-уми сентябри соли 2021 баргузор гардида буд. Дар тӯли якчанд рӯз ин силсилафилм на танҳо дар Кореяи Ҷанубӣ, балки дар тамоми ҷаҳон шӯҳрати беандоза пайдо кард. Имрӯз мо ба шумо дар бораи чӣ тавр зуд шӯҳрати ҷаҳонӣ касб кардан ва то чӣ андоза дар шабакаҳои иҷтимоӣ маъруф гардидани «Калмарбозӣ» хоҳем гуфт.

Танҳо пас аз як ҳафтаи намоиши нахустин қисми он, филми мазкур яке аз пурбинандатарин филмҳо гардида, мавриди баррасии зиёд қарор гирифт. «Калмарбозӣ» на танҳо ба яке аз филмҳои сербинандатарин табдил ёфт, балки он ба қатори филмҳои беҳтарини кишварҳои гуногуни олам шомил шуд. Лозим ба ёдоварист, ки дар таърихи филмофарии Кореяи Ҷанубӣ чунин муваффақият бори аввал даст ёфтааст.

Мунаққидони синамо бар он назаранд, ки дар филм интихоб ва ҷобаҷогузории ҳунармандон дар нақшҳо хеле ҳирфаӣ ба роҳ монда шудааст. Аз ин рӯ, онҳо ба коргардони филм Хван Дон Хёка таҳсин гуфтанд.

«Калмарбозӣ» ба бозии махфии зинда мондан бахшида шудааст, ки дар он одамони ноумед барои гирифтани мукофотҳои калони пулӣ дар сурати пирӯз шудан, хатарҳои зиёдеро ба дӯши худ мегиранд.

«Squid Game» то ба дараҷае таваҷҷӯҳи тамошобинонро ба худ ҷалб кардааст, ки онҳо намоиши қисми навбатии филмро бақаророна пурсон мешаванд. Тамошобинон на танҳо тахминҳои худро дар бораи қисми баъдии филм пешниҳод мекунанд, балки миёни ҳамдигар ҳазлу шӯхӣ намуда, порчаҳои ҷолиберо аз филми мазкур дар саҳифаҳои худ дар шабакаҳои иҷтимоӣ мегузоранд.

Ин «бозӣ бар ивази зинда мондан» ба бозии кӯдакона монанд аст. Он дар ҳудуди кишварҳои ИДМ ба бозии «Баҳр як бор мавҷ мезанад» (Море волнуется раз) шабоҳат дорад.

“Лонаи занбӯри шакар” Tik-Tok-ро фатҳ кард

Бозиҳои машҳури «Лонаи занбӯри шакар» низ барои санҷиши маҳорат мувофиқ аст. Дар ин бозӣ ба одамон як сӯзан ва кулчақанди коромелии зиёд медиҳанд. Дар муддати муайяншуда бояд шахс кулчақандро ношикаста, расми пешниҳодшударо тасвир кунад. Айни ҳол блогерон дар бозии коромелии «хоки-поки» на танҳо маҳорати худро санҷидан мехоҳанд, балки онро ба як бозии маъмули тирамоҳии Tik-Tok табдил додаанд.

Тарзи омода намудани асал аз шакар:

Маҳсулоти лозима:

Хокаи шакар - 200 г.;

Асал - 50 мл.;

Содаи нонпазӣ - 1 қошуқи калон;

Варақаҳои барои пухтупазро гирифта, ба болояш равған бимолед.

Шакар ва асалро дар як зарф омехта карда, ба он 20 миллилетр об ҳамроҳ намуда, ба болои оташ гузоред. Вақте ки маҳсулот ҷӯшид, 11 дақиқа интизор шавед ва сипас ба он як қошуқ сода илова намоед, баъдан ҳамаи маҳсулотро бо ҳам хуб омехта кунед. Маҳсулоти омодашударо ба болои коғази пухтупаз рехта ва то сард шуданаш интизор шавед. Ҳамин тавр, коромеле, ки мо дар боло зикр кардем, омода мешавад.

Мемҳо

Мутаассифона, қисме аз тамошобинон намегузоранд, ки ин силсилафилм пурра ба охир расад. Филм ҳоло ба охир нарасида, дар шабакаҳои иҷтимоӣ атрофи он ҳаргуна суханҳо, тамасхурҳо ва ҳазлҳои ноҷо зиёд шудаанд. На танҳо истифодабарандагони Tik-Tok, балки корбарони Twitter ҳам ин филмро ба масхара кашидаанд. Бояд гуфт, ки ин ҳазлҳои ноҷои корбарони шабакаҳои иҷтимоӣ ба филмофарон бетаъсир нахоҳад буд.

Бо вуҷуди он, ки филми мазкур ба баъзе аз тамошобинон писанд нагардид, ҳамчунин ба маъруфияташ таъсир нарасонд. Дар «Кинопоиск» ба ин филм аз 10 бали муқарраршуда - 7,8 бал гузоштанд ва дар портали IMDb бошад он 8,3 хол баҳогузорӣ шудааст.

Ин силсилафилм дар Тоҷикистон чандон маҳбубият надошта бошад ҳам, аммо бисёриҳо аллакай онро тамошо кардаанд.

"Ман тамошои ин филмро ба ҳама тавсиа медиҳам. Афсӯс, ки эпизодҳо хеле каманд. Қисмҳои баъдии филмро бо шавқ интизорӣ мекашам. Баъзан аз тамошои «Калмарбозӣ» дар ман ҳисси тарс ба вуҷуд меомад, ҳамчунин лаҳзаҳое буданд, ки беихтиёр ашк мерехтам. Хулоса, филми мазкур баҳри беканори эҳсосҳост» -мегӯяд дар сӯҳбат ба мо сокини шаҳри Душанбе - Ориёно.

Мавсими дуюми филм кай шурӯъ мешавад, ҳоло ҳам маълум нест. Дар ин маврид на истеҳсолкунандагони филм ва на масъулони Netflix маълумоте нашр накардаанд. Аммо ба мисли ҳама мухлисон, мо умед дорем, ки дар нимаи дуюми соли 2022 дӯстдорони филми мазкур аз тамоми ҷаҳон идомаи онро тамошо хоҳанд кард.