Хабарҳои асосӣ дар Тоҷикистон
Қариб 30 парвоз дар як ҳафта: Тоҷикистон шумори парвозҳои чартериро аз Русия зиёд мекунад
Нашр шуд
ВКХ Тоҷикистон нимаи дуюми имрӯз рӯйхати пешакии парвозҳои чартериро аз Русия нашр мекунад.
Ҳукумати Тоҷикистон бо ҷониби Русия масъалаи роҳандозии парвозҳои иловагии чартериро то охири моҳ аз шаҳрҳои гуногуни ин кишвар мувофиқа кард, хабар дод ба “Азия-Плюс” як манбаи огаҳ аз ВКХ Тоҷикистон.“Шумори парвозҳои чартерӣ аз Русия ба Тоҷикистон зиёд мешавад, аз Маскав ҳар рӯз ҳади ақал 3 парвоз ва аз дигар минтақаҳо 1 ё 2 парвоз анҷом дода мешавад. Барои дастрас кардани билет ба ин хатсайрҳо шаҳрвандон мисли пешин бояд дар сафорат ва консулгариҳои Тоҷикистон худро ба қайд гузоранд”, - қайд кард манбаъ.
Зикр шуд, ки зимни бозгашт ба ватан шаҳрвандон бояд маълумотнома дар бораи мубтало набудан ба коронавирус, ки давоми 96 соат (4 шабонарӯз) қабл аз омадан ба Тоҷикистон омода гардидааст, дошта бошанд. Кӯдакони то 3-сола аз пешниҳоди маълумотномаи мазкур озод мебошанд.
Ба иттилои манбаъ, ҳамаи парвозҳо аз ҷониби ширкати ҳавопаймоии “Сомон Эйр” иҷро карда мешаванд.
Дар Департаменти иттилооти ВКХ Тоҷикистон ба “Азия-Плюс” тасдиқ намуданд, ки бо мақомоти Русия роҳандозии парвозҳои иловагии чартериро аз Русия ба Тоҷикистон мувофиқа кардаанд. Аммо дар бораи зиёд шудани шумори хатсайрҳо чизе нагуфтанд.
“Мо ҳоло маълумот ҷамъоварӣ карда истодаем ва имрӯз дар сомонаамон дар бораи хатсайрҳо хабар нашр мекунем”, - изҳор доштанд дар ВКХ.
Ёдрас мекунем, ки то 15 сентябр аз Русия ба Тоҷикистон беш аз 50 парвози чартерӣ анҷом дода шуд.
Хабарҳои ҷолибтарин дар телеграмм-канали Halva.tj
Маводи зиёдтарро дар гурӯҳи фейсбукии Halva.tj ва саҳифаи мо дар Instagram дарёфт намоед
