Тибқи тағйирот ба Қонуни ҳизбҳои сиёсӣ аз ин ба баъд аҳзоби сиёсии Тоҷикистон, ки ба порлумон роҳ меёбанд, аз буҷаи давлат барои ҳар як узв 7 дарсади маблағи нишондиҳанда барои ҳисобҳоро дарёфт хоҳанд кард.

Вакилони Маҷлиси намояндагони Тоҷикистон дар ҷаласаи ахири лоиҳаи тағйиру иловаҳо ба қонун «Дар бораи ҳизбҳои сиёсӣ»-ро баррасӣ ва тасвиб карданд.

Музаффар Ашуриён, вазири адлияи Тоҷикистон дар ҷаласаи порлумон гуфт, ки тибқи ин лоиҳа сармоягузории давлатии ҳизбҳои сиёсӣ аз рӯйи натиҷаҳои ширкат дар интихобот сурат мегирад.

Ба гуфтаи вай, ҳизбҳои сиёсие, ки ҳадди ақал 5 дарсади овози интихобкунандагонро соҳиб мешаванд, ба маблағи 7 дарсади нишондиҳанда барои ҳисобҳо зарб ба шумораи овозҳои гирифтаи ҳизби сиёсӣ сармоягузорӣ мешаванд.

Вазири адлияи Тоҷикистон гуфт, ки ҳадафи ин иқдом таҳкими низоми бисёрҳизбӣ ва шаффофияти фаъолияти ҳизбҳои сиёсӣ буда, муқаррароти мазкур дар қонунгузории кишварҳои хориҷӣ ва Иттиҳодияи Давлатҳои Мустақил пешбинӣ гардидааст.

Дар ҳамин ҳол Абдуҳалим Ғаффорзода, раиси Ҳизби сосиалистӣ ва вакили Маҷлиси намояндагони Тоҷикистон гуфт, ки соли 2003 шахси вай пешниҳод дода буд, ки ҳизбҳои сиёсии ин кишвар аз буҷаи давлатӣ сармоягузорӣ шаванд, вале бо пофишории ҳизбҳои наҳзати исломӣ (фаъолияташ бо қарори Додгоҳи Олӣ мамнуъ аст) ва сосиал-демократ ин пешниҳод амалӣ нашуд.

Бояд гуфт, ки дар айни замон дар порлумони Тоҷикистон 6 ҳизби сиёсӣ намоянда дошта, аз ҷумла 3 ҳизби сиёсӣ фраксиюни ҳизбии худро доранд.

Гуфтанист, бештари курсиҳои Маҷлиси намояндагони Тоҷикистон дар ихтиёри намояндагони Ҳизби халқӣ-демократии ин кишвар аст.