ВКХ Тоҷикистон хабар дод, ки 6 октябр дар Москав ҳайати Тоҷикистон таҳти сарварии муовини вазири корҳои хориҷӣ Музаффар Ҳусейнзода дар чорабинии Рӯзҳои СААД, ки ба 18-умин солгарди имзои Оинномаи Созмон бахшида шудааст, ширкат варзиданд.

Дар доираи чорабиниҳо, ҳайатҳо дар мизи мудаввари "СААД: Роҳнамо барои рушди стратегӣ" бо иштироки муовинони вазирони корҳои хориҷии кишварҳои узви ин созмон ширкат варзиданд. Дар мулоқот Музаффар Ҳусейнзода дидгоҳи ҷониби Тоҷикистонро дар бораи рушди минбаъдаи фаъолияти СААД баён кард. 

Аҳамияти нигоҳ доштани диққати Созмон дар мубориза бо таҳдидҳои муосир - терроризм ва экстремизми байналмилалӣ, гардиши ғайриқонунии маводи мухаддир ва силоҳ, ҷинояткории муташаккилона, муҳоҷирати ғайриқонунӣ ва хариду фурӯши одамон, ки ҳам дар рӯзномаи байналмилалӣ ва ҳам минтақавӣ боқӣ мондаанд, таъкид карда шуд.

Сар карда аз моҳи декабри соли равон раисӣ дар СААД ба Тоҷикистон мегузарад. 

«Кишвари мо самтҳои афзалиятноки раёсати худро дар СААД таҳия менамояд, ки онро президент Эмомалӣ Раҳмон дар ҷаласаи Шӯрои амнияти дастаҷамъӣ муаррифӣ хоҳад кард. Тоҷикистон барои мусоидат ба татбиқи ҳадафҳо ва вазифаҳои Созмон ва таъмини самаранокии фаъолияти он саъй хоҳад кард », - қайд кард муовини вазир.