Нурмуҳаммад Соқиб, вазири иршод, ҳаҷ ва вақфи Толибон* гуфт, ки нархи ҳаҷ барои зоирони суннимазҳаб 3865 долар ва барои зоирони шиъа 3915 долар аст.

Соқиб рӯзи 26-уми март дар як нишасти хабарӣ дар Кобул гуфт, зоирони шиъа дар қиёс ба зоирони суннимазҳаб 50 долар бештар пардохт мекунанд. Гуфта мешавад, ки дар гузашта зоирони шиъа бештар пул медоданд.

Вай дар идома афзуд, ки имсол барои Афғонистон 30 ҳазор саҳмияи ҳаҷ ҷудо шудааст.

Соли гузашта низ саҳмияи ҳаҷ барои  Афғонистон ҳамин миқдор буд.

Зикр мешавад, ки агар имсол 30 ҳазор нафар ба ҳаҷ фиристода шаванд, ҳазинаи умумии хароҷоти ҳаҷ барои шаҳрвандони Афғонистон ба беш аз 177 милён долар мерасад.

Ин дар ҳолест, ки тибқи арзёбиҳои Барномаи ҷаҳонии ғизо дар ҳоли ҳозир сеяки ҷамъияти Афғонистон дар хатари гуруснагӣ қарор дорад ва бисёре аз хонаводаҳо ба далели маҳдуд будани имконот барои касби даромад дар таъмини ниёзҳои фарзандони худ бо мушкил мувоҷеҳ ҳастанд.

Гуфтанист, ки Кумитаи дини Тоҷикистон арзиши хидматрасониҳо барои мавсими ҳаҷи соли равонро 57 ҳазор сомонӣ муайян кардааст.

Аз сӯйи дигар Арабистони Саудӣ барои анҷоми ҳаҷи фарзӣ дар соли 2024 ба Тоҷикистон 7 ҳазор саҳмия ҷудо кардааст.

*Фаъолияти ин гурӯҳ дар Тоҷикистон мамнуъ аст