Ҳафтаи оянда дар шаҳри Хоруғи Вилояти Мухтори Кӯҳистони Бадахшон Форуми навбатии байналмилалии соҳибкорию сармоягузории «Помир-Инвест 2022» баргузор мешавад.

Ба иттилои Мақомоти иҷроияи ҳокимияти давлатии ВМКБ, 18-уми августи ҳамин сол дар Хоруғ бо иштироки сармоягузорони дохиливу хориҷӣ, шарикони рушд, соҳибкорони муваффақи ватаниву хориҷӣ ва ҳамватанони бурунмарзӣ Форуми байналмилалии «Помир-Инвест 2022» барпо мегардад.

Манбаъ мегӯяд, Форуми байналмилалии «Помир-Инвест 2022» аз бахшҳои  саноат, энергетика ва сайёҳӣ иборат буда, интизор меравад иштирокдорони он роҳҳои ҷалби сармоя ба рушди иқтисоди Бадахшонро баррасӣ намоянд.

Ҳадафи ин форумро дастандаркорон ҷалби ҳарчи бештари  сармояи хориҷӣ ба иқтисоди Бадахшон унвон кардаанд.

Соли 2019 низ дар Бадахшон Форуми байналмилалии сармоягузории «Помир-Инвест 2019» бо ҳузури беш аз 150 сармоягузори ватаниву хориҷӣ баргузор гардида буд. Дар он аз ҷумла соҳибкорону сармоягузорон аз Иёлоти Муттаҳидаи Амрико, Канада, Ҷумҳурии Исломии Покистон, Ҷумҳурии Исломии Афғонистон, Ҷумҳурии Ҳиндустон ва Ҷумҳурии Мардумии Чин иштирок доштанд.

Дар шаҳри Батумии Гурҷистон Консулгарии фахрии Тоҷикистон кушода шуд