Шӯрои уламои Маркази исломии Тоҷикистон бо судури фатво пӯшидани либоси занонаро тибқи шариати исломӣ тавсия кардааст.

Ин фатво ба далели ихтилофот дар ҷомеа дар пайи манъи воридот, фурӯш ва пӯшидани либосҳои ба фарҳанги тоҷикон бегона дар моҳи июн, содир шуд.

Дар матни нашршуда дар вебсайти ин шӯро гуфта мешавад, ки либоси миллии занони тоҷик аз рӯймол, либос ва шим иборат буда, ба талаботи таълимоти ҳанафия дар ислом комилан ҷавобгӯ аст. Дар фатво навъҳои буриш ва ранги либоси занон маҳдуд нашудааст, балки пӯшидани либоси тангу сиёҳи занона, шаффоф ва ё дигар, ки узвҳои баданро намоён месозад, тавсия дода намешавад.

Дар баробари ин, тавсия дода мешавад, ки аз пӯшидани либоси сиёҳ худдорӣ шавад, зеро «сиёҳ аз нигоҳи мазҳабӣ фарз нест ва инчунин бо хусусиятҳои миллӣ ва шароити ҷуғрофии мо созгор нест».

Шурои уламои Маркази исломии Тоҷикистон ба хотири ҳифзи суботу амнияти ҷомеа ва эҳтиром ба ахлоқи динию миллӣ аз сокинон хоҳиш мекунад, ки “аз пӯшидани либосҳои ба фарҳангу дини мо бегона ва ғайриахлоқӣ, ки бо ҳадафҳои ғаразнок тарғиб мешавад, худдорӣ кунанд".

Дар ин фатво гуфта мешавад, ки занон ба пӯшидани либосҳои тарҳрезишудаи миллӣ, ки меъёрҳои ахлоқию диниро инъикос намуда, ба фарҳанги миллӣ арҷгузорӣ мекунанд, ташвиқ карда мешавад.

Ёдовар мешавем, ки Эмомалӣ Раҳмон, раисҷумҳури Тоҷикистон, дар моҳи март дар мулоқот бо аҳли ҷомеа ва дин изҳор дошт, ки либоси миллӣ инъикосгари арзишҳои моддӣ ва маънавии гузаштаи мардуми тоҷик аст ва дар ин замина аз тақлид ба фарҳанги бегона дар либоспушӣ интиқод кард.

Бояд гуфт, ки моҳи июни соли ҷорӣ дар Тоҷикистон тарҳи нави қонун «Дар бораи танзими ҷашну маросим дар Ҷумҳурии Тоҷикистон» мавриди иҷро қарор гирифт. Ин қонун аз ҷумла, манъи воридот, фурӯш ва пӯшидани либосҳои ба фарҳанги тоҷикон бегонаро дар бар мегирад.

Дар телеграм моро пайгирӣ кунед!
https://t.me/halvaTJnews