Соли гузашта дар Тоҷикистон ба бештар аз 238 ҳазор нафар шаҳрванд дар ҳаҷми зиёда аз 110 миллион сомонӣ кӯмаки унвонии иҷтимоӣ расонида шудааст. 

Ба иттилои Хадамоти матбуоти Президент,  ин нукта дирӯз дар ҷараёни маҷлиси васеи Ҳукумати Тоҷикистон, ки таҳти раёсати Эмомалӣ Раҳмон баргузор шуд, зикр гардид. 

Дар ин ҷаласа гуфта шуд, ки соли гузашта маблағгузории буҷетӣ ба соҳаи ҳифзи иҷтимоии аҳолӣ низ афзоиш ёфта, ба ин самт 172 млн сомонӣ равона карда шуд, ки нисбат ба соли 2020-23,4 фоиз бештар мебошад.

Эмомалӣ Раҳмон ба масъалаи пардохти саривақтии нафақа ва суғуртаи иҷтимоӣ таваҷҷуҳ зоҳир карда, дар ин баробар дастури қатъӣ дод, ки бо мақсади таъмини шаффофият тамоми муносибатҳои молӣ дар ин заминаҳо ба шакли электронӣ гузаронида шавад.

Ҳамчунин, Президент ба Вазорати тандурустӣ ва ҳифзи иҷтимоии аҳолӣ супориш дод, ки лоиҳаи Стратегияи рушди ҳифзи иҷтимоии аҳолии Ҷумҳурии Тоҷикистонро таҳия ва барои баррасӣ ба Ҳукумат пешниҳод намояд.

Таъкиди Президент ба пардохти саривақтии нафақа дар ҳолест, ки ҳафтаи гузашта вай фармони зиёд намудани баъзе аз намудҳои нафақаро имзо карда буд. 

Аз ҷумла, сар аз оғози имсол нафақаи ятимон ва ноболиғони бесаробон ба андозаи 25 дарсад аз ҳаҷми ҳадди ақали нафақаи синнусолӣ зиёд шуд.