Қонуни Ҷумҳурии Тоҷикистон “Дар бораи ворид намудани тағйиру иловаҳо ба Кодекси андози Ҷумҳурии Тоҷикистон” таҳрири нави Кодекси андозро қабул намуд. Қонун аз 16 январ эътибори худро пайдо мекунад. Акнун ширкатҳои Google, Apple, Facebook ва Microsoft барои хизматрасонии худ дар ҳудуди Ҷумҳурии Тоҷикистон андоз хоҳанд супурд.

Аз ширкатҳои дар боло зикр гардида андоз аз арзиши иловагӣ ситонида мешавад.  Ширкатҳо, намояндагии ширкатҳое хориҷие, ки мустақиман ё тавассути миёнаравҳо хизматрасониҳои ширкатҳои номбаршударо ба корхонаҳо ва шахсони воқеии Тоҷикистон пешниҳод мекунанд дар зери тасарруфи қонуни мазкур дохил мешаванд. Чунин таҷрибаро кишварҳои Россия, Узбакистон ва Испания низ татбиқ намудаанд.

"Вақти он расидааст, ки тамоми корҳоеро, ки ба воситаи интернет анҷом дода мешаванд, ба танзим дарорем. Бояд ба қонуни андози кишвар тағйирот ворид шавад, ки мувофиқи он ширкатҳои хориҷие, ки ба шахсони инфиродӣ хизматрасонии электорниро пешниҳод мекунанд, андоз супоранд",- омадааст дар мактубе, ки Нусратулло Давлатзода раиси Кумитаи Андози ба раисҷумҳури кишвар Эмомалӣ Раҳмон қаблан ирсол карда буд.