Асарҳо барои дарёфти Ҷоизаи давлатии Абӯабдуллоҳи Рӯдакӣ дар бахшҳои адабиёт, ҳунар, меъморӣ ва рӯзноманигорӣ дар соли 2024 эълон шуд.

Тибқи иттилоъи хабаргузории расмии "Ховар", дар бахши адабиёт Иттиҳодияи нависандагони Тоҷикистон маҷмуаи шеърҳои Рустам Ваҳҳобзода бо номи  «Қаламрави меҳр»-ро пешниҳод кардааст.

Аз сӯйи дигар дар бахши намоишсаро ва синамо Иттиҳодияи синамогарони Тоҷикистон ҳайати эҷодии филми ҳунарии «Роҳ» - коргардон Носир Саидро пешниҳод кардааст.

Ҳамчунин дар бахши мусиқӣ ва ҳунарнамоӣ «Луғатномаи тафсирии истилоҳоти мусиқӣ»-и Ҷӯрахон Обидпур ва дар бахши ҳунари рассомӣ ва меъморӣ  асари «Тахти тоҷикон» дар муҷтамаъи «Майдони Истиқлол»-и Самӣ Азизиён пешниҳод шудааст.

Ҳамзамон дар бахши эҷодиёти бадеъӣ барои кӯдакон ва наврасон маҷмуаи қисса ва ҳикояҳои «Кафшергар»-и Равшан Махсумзод ва дар бахши публисистика маҷмуаи очерк, мусоҳиба ва мақолаҳои публисистии Абдураҳмон Абдуманнон «Аз дирӯз ва имрӯзи адабиёти тоҷик» пешниҳод гардидааст.

Ҳамчунин дар бахши тарҷума, пажӯҳиш ва тарғиби адабиёти тоҷик дар кишварҳои хориҷӣ Иосиф Брагинскийро барои силсилаи асарҳои адабиётшиносӣ, чопи осори адибони тоҷик дар нашриёти Русия ва Аврупо ва тарғиби асарҳои адабиёти классикӣ ва муосири тоҷик пешниҳод кардааст.

Бо назардошти ин раёсати Кумитаи Ҷоизаи давлатии Абӯабдуллоҳи Рӯдакӣ аз коршиносон ва тамоми ҳаводорони адабиёту ҳунар дархост кард, ки моҳҳои март-май дар муҳокимаи ин асарҳо тавассути расонаҳо фаъолона ширкат кунанд.

Гуфтанист, ҷоизаи давлатии Абуабдуллоҳи Рӯдакӣ барои комёбиҳои намоён дар адабиёт, ҳунар ва меъморӣ эҳдо мешавад. Ҷоизаи мазкур моҳи январи соли 1963 таъсис шуда, иттиҳодияҳои нависандагон, рассомон, оҳангсозон, синамогарон ва меъморони Тоҷикистон ба он беҳтарин асарҳоро пешниҳод медиҳанд ва баъди баррасии ҳамаҷониба барандагон эълон мегарданд.