Дар нимсолаи аввали соли 2024 наздики 393 ҳазор шаҳрванди Тоҷикистон ба муҳоҷирати корӣ ба хориҷ рафтаанд, ки мизбони 90 дарсади онҳо Русия аст.

Вазорати кор, муҳоҷират ва шуғли аҳолии Тоҷикистон эълон кард, ки дар шаш моҳи аввали соли ҷорӣ 392 805 ҳазор шаҳрванди ин кишвар ба муҳоҷирати корӣ рафтаанд, ки нисбати соли гузашта 16 дарсад камтар аст. Дар нимсолаи аввали соли 2023 аз Тоҷикистон 467 247 нафар ба хориҷи ин кишвар барои дарёфти кор сафар карда буданд.

Тибқи иттилои ин ниҳод, аз миёни шаҳрвандони ба муҳоҷират сафаркардаи Тоҷикистон 314 052 нафар мард ва 78 753 нафар зан ҳастанд, ки мутаносибан 17 дарсад ва 12 дарсад нисбат ба соли гузашта кам шудааст.

Дар ин замина таъкид шуд, ки дар ин муддат беш аз 90 дарсади муҳоҷирони корӣ аз Тоҷикистон ё худ ҳудуди 387 ҳазор нафар ба Русия рафтаанд.

Ҳамзамон зикр мешавад, ки дар нимсолаи аввали соли ҷорӣ муҳоҷирати корӣ аз Тоҷикистон ба Русия низ нисбати соли гузашта 15% коҳиш ёфтааст.

Дар баробари ин, дар ин муддат 26 ширкати дорои иҷозатнома 5158 нафар шаҳрванди Тоҷикистонро бо ҷойи кор дар 17 кишвари ҷаҳон, аз ҷумла, Русия, Қазоқистон, Белорус, Латвия, Литва, Туркия, АМА, Британия, Лаҳистон, Олмон, Арабистони Саудӣ, Черногория, Эстония, Канада ва Маҷористон таъмин кардаанд.

Аз сӯи дигар гуфта мешавад, ки дар шаш моҳи соли ҷорӣ аз хориҷи кишвар ба Тоҷикистон 324 065 муҳоҷири корӣ баргаштааст, ки аз ин теъдод 243 546 нафар (- 3%) ва 80 519 нафар зан (+ 25%) ҳастанд.

Дар телеграм моро пайгирӣ кунед!
https://t.me/halvaTJnews