Маблағи интиқолии муҳоҷирон ба Тоҷикистон дар соли гузашта 5,7 миллиард долларро ташкил дод.

Ҳаҷми интиқоли пул аз муҳоҷирон ба Тоҷикистон дар соли 2023 ба нишондоди рекордӣ расид. Дар ин бора дар гузориши Бонки Осиёии Рушд дар бораи муҳоҷирати корӣ хабар дода мешавад.

Дар ин гузориш таъкид мешавад, ки дар соли 2023 воридоти пули муҳоҷирон ба Тоҷикистон ба маблағи рекордии 5,7 миллиард доллар расид, ки нисбат ба соли қаблӣ 6,6% бештар аст.

Нашрияи "Азия-плюс" бо такя ба ин гузориш менависад, ки Тоҷикистон дар соли 2023 дар феҳристи кишварҳо бо ҳиссаи болои интиқолоти пулӣ нисбат ба ММД (48,2%) қарор гирифт.

Дар идома гуфта мешавад, ки дар соли 2022 маблағи интиқолии муҳоҷирон ба Тоҷикистон 5,3 миллиард доллар ва дар соли 2021 - 2,9 миллиард долларро ташкил дод.

То соли 2022 ҳаҷми рекордии воридоти пули муҳоҷирон ба Тоҷикистон дар соли 2013 сабт шуда буд, ки ба 3,7 миллиард доллар расид.

Дар ҳамин ҳол, дар моҳи феврали соли ҷорӣ Вазорати меҳнат, муҳоҷират ва шуғли аҳолии Тоҷикистон хабар дод, ки муҳоҷирати корӣ аз ин кишвар дар соли гузашта нисбат ба соли 2022 16% коҳиш ёфта, ба 652 ҳазор нафар расид.

Тибқи иттилои ин ниҳод, соли гузашта шумораи муҳоҷироне, ки ба Тоҷикистон баргаштаанд, 7 дарсад афзуда, беш аз 590 ҳазор нафарро ташкил дод.

Дар телеграм моро пайгирӣ кунед!
https://t.me/halvaTJnews