Хабарҳои асосӣ дар Тоҷикистон
Раҳмон ба Гуттериш: Ҷомеаи ҷаҳонӣ кӯмак ба мардуми Афғонистонро бояд идома диҳад
Нашр шуд
Сарвари давлат Эмомалӣ Раҳмон зимни як суҳбати телелфонӣ бо Антониу Гутерриш Дабири кулли Созмони Милали Муттаҳид дурнамои ҳамкории Тоҷикистон бо ниҳодҳои ин созмон ва ҳам вазъи феълии Афғонистонро баррасӣ кард.
Ба иттилои Хадамоти матбуоти Президент, дар гуфтугӯи телефонии Эмомалӣ Раҳмон ва Антониу Гутерриш, ки рӯзи 26-уми август баргузор гардид, ҳолати кунунӣ ва дурнамои муносиботи Тоҷикистон ва Созмони Милали Муттаҳид дар масъалаҳои калидии байналмилалӣ, аз ҷумла таъмини сулҳу суботи фарогир ва рушди устувор мавриди баррасӣ қарор гирифт.
Дар ин суҳбат Сарвари давлат ба тақвият бахшидан ба ҳамкории Душанбе бо СММ ва ниҳодҳои сохтории он дар масоили обу иқлим, мубориза бо терроризм, ифротгароӣ, гардиши ғайриқонунии маводи мухаддир ва дигар зуҳуроти ҷинояткории муташаккили фаромарзӣ ибрози омодагӣ намудааст.
Манбаъ меафзояд, масъалаи Афғонистон аз дигар меҳварҳои аслии гуфтугӯи Эмомалӣ Раҳмон ва Антониу Гуттериш будааст ва тарафҳо дар робита ва вазъи кунунии ин кишвар табодули назар кардаанд.
Эмомалӣ Раҳмон ба Дабири кулли СММ гуфтааст, ки ҷомеаи ҷаҳонӣ бояд расонидани кӯмакҳои башариро ба мардуми азияткашидаи Афғонистон идома диҳад ва онро дар шароити мушкили имрӯза танҳо нагузорад.
Ҳамчунин, Президент бо баёни омодагӣ ҷиҳати саҳмгузорӣ дар ин раванд, таъкид доштааст, ки Тоҷикистон имконоти логистикии кишварро барои расонидани ин гуна кӯмакҳо пешниҳод менамояд.
Бояд гуфт, ки Эмомалӣ Раҳмон дар мулоқот бо роҳбарони кишварҳои ҷаҳон ва созмонҳои байналмилалӣ пайваста ба масъалаи расонидани кӯмакҳои башарӣ ба мардуми Афғонистон таъкид менамояд. Вай борҳо гуфтааст, ки Тоҷикистон хостори амнияти сартосарӣ ва сулҳу субот дар ин кишвари ҳамсоя мебошад.
Моҳи августи соли гузашта гурӯҳи Толибон* зимоми ҳукуматро ба дасти худ гирифт, аммо инак бо гузашти як сол ҳеч кишваре давлатдории ин гурӯҳро ба расмият нашинохтааст. Созмонҳои байналмилалӣ дар чанд моҳи ахир борҳо аз вазъи бисёр ногувори башарӣ дар ин мамлакат хабар додаанд.
*Толибон - ҳаракати террористии фаъолияташ мамнӯъ
Хабарҳои ҷолибтарин дар телеграмм-канали Halva.tj
Маводи зиёдтарро дар гурӯҳи фейсбукии Halva.tj ва саҳифаи мо дар Instagram дарёфт намоед