Дар Тоҷикистон марҳилаи дуюми безарарсозии партовҳои радиоактивӣ дар ҳамкорӣ бо ширкати "Росатом"-и Русия амалӣ мешавад.

Тоҷикистон ва Русия барои иҷрои марҳилаи дуввуми лоиҳаи безарарсозии партовҳои радиоактивӣ дар вилояти Суғд омодагӣ мегиранд. Дар ин бора Шералӣ Кабир, вазири саноат ва технологияҳои нави Тоҷикистон ахиран дар нишасти матбуотӣ хабар дод.

«Лоиҳа бо «Росатом» хеле муваффақ аст, марҳилаи аввал алакай анҷом ёфт, ин лоиҳаи бузург аст, ки панҷ моҳ пеш аз мӯҳлат ба анҷом расид. Қарори ҳукумати Русия алакай содир шудааст, марҳилаи дуюмаш дар давоми се соли оянда амалӣ мешавад, маблағгузорӣ аз буҷаи Русия сурат мегирад», - гуфт Шералӣ Кабир.

Бояд гуфт, ки дар Тоҷикистон конҳои қаблан истифодашудаи уран ва ҳамчунин як қатор корхонаҳои коркарди маъдан мавҷуд аст. Яке аз калонтарин конҳо "Табошар"  дар ҳудуди шаҳри Истиқлоли вилояти Суғди Тоҷикистон мебошад, ки ҳанӯз соли 1925 кашф шуда буд. Дар ин кон истихроҷи фаъоли уран аз соли 1944 то соли 1965 идома дошт. 

Дар моҳи октябри соли 2023 кормандони ширкати "Росатом" бо ширкати мутахассисони тоҷик тарҳи безарарсозии ин кони уранро анҷом доданд.

Хотиррасон мекунем, ки ҳукумати Русия барои идомаи лоиҳаи безарарсозии партовҳои радиоактивӣ дар қаламрави Тоҷикистон барои солҳои 2025-2028 беш аз 1,5 млрд рубли русӣ ҷудо кардааст.

Дар телеграм моро пайгирӣ кунед!
https://t.me/halvaTJnews