Рӯзҳои 29 - 30 октябр дар шаҳри Маскави Русия ҳамоиши байналмилалии гумрукӣ – 2024 баргузор гардид.

Байни Хадамоти гумруки Тоҷикистон ва Хадамоти федералии гумруки Русия созишнома ташкили низоми содакардашудаи анҷоми амалиёти гумрукӣ ҳангоми интиқоли мол ва воситаҳои нақлиёт ба имзо расид. Дар ин бора Хадамоти гумруки Тоҷикистон иттилоъ медиҳад.

Ин созишнома дар доираи ҳамоиши байналмилалии гумрукӣ – 2024, ки 29-30 октябр дар шаҳри Маскав баргузор гардид, имзо шуд.

Гуфта мешавад, ки дар ин ҳамоиши байналмилалии гумрукӣ Хуршед Каримзода, сардори Хадамоти гумруки Тоҷикистон, иштирок намуд.

Ҳамоиш аз ҷониби Хадамоти федералии гумруки Русия ҳамасола баргузор шуда, заминаи муфид барои табодули таҷрибаи пешқадам дар самти танзими фаъолияти гумрукӣ дониста мешавад.

Бахусус ҳамоиш барои таҳкими муносибатҳои мақомоти гумрук бо доираҳои тиҷоратӣ шароити мусоид фароҳам меоварад.

Таъкид мешавад, ки дар ҳамоиши байналмилалии гумрукӣ – 2024 масъалаҳои мубрами фаъолияти гумруки байналмилалӣ, тамоюлҳои калидӣ дар соҳаи фаъолияти иқтисоди хориҷӣ ва тағйирот дар тиҷорати байналмилалӣ баррасӣ гардид.

Ҳамчунин масъалаҳои рақамикунонии савдои хориҷӣ, ҷорӣ намудани зеҳни сунъӣ дар равандҳои расмиёти гумрукӣ, рушди тиҷорати электронӣ, тағйироти долонҳои логистикӣ ва дигар масъалаҳои муҳим дар самти фаъолияти гумрукӣ баррасӣ шуданд.

Дар телеграм моро пайгирӣ кунед!
https://t.me/halvaTJnews