Ширин Амонзода, вазири меҳнат, муҳоҷират ва шуғли аҳолии Тоҷикистон, рӯзи 4 декабр бо кормандони намояндагии вазорати меҳнат, муҳоҷират ва шуғли аҳолӣ дар Русия мулоқоти онлайн баргузор кард, менависад сайти ин ниҳод.

Дар ҷараёни мулоқот масъалаҳои ҳимояи ҳуқуқ ва манфиатҳои муҳоҷирони меҳнатии Тоҷикистон дар Русия ҳангоми пандемия, ҳалли саривақтии муроҷиатҳо ва мушкилоти онҳо, ҳамоҳангсозии кори диаспораҳо ва ҷамъиятҳои тоҷикони бурунмарзӣ оид ба расонидани кӯмак, мусоидат ба шуғл, инчунин таҳкими иттилоот ва кор дар байни муҳоҷирони меҳнатӣ баррасӣ шуданд.

Барои баланд бардоштани самаранокии кор бо кормандони вазорат машваратҳо гузаронида шуданд.

Барои таҳлили вазъи кунунӣ ва шароити кори муҳоҷирони меҳнатии Ҷумҳурии Тоҷикистон дар Федератсияи Россия, инчунин таҳияи нақшаи кории вазорат барои нимсолаи аввали соли 2021 супоришҳои мушаххас дода шуданд.

Қарор аст, ки ҳар рӯзи ҷумъа мулоқотҳои роҳбарияти вазорат ва намояндагии вазорат дар Федератсияи Русия баргузор карда шаванд.