Дар Тоҷикистон айни замон 88 лоиҳаи сармоягузории давлатӣ бо ҳазинаи умумии 4,65 млрд доллар амалӣ мешавад.

Ба ҳолати аввали июли соли ҷорӣ воридоти сармояи хориҷӣ ба Тоҷикистон 1,95 млрд долларро ташкил дод, ки нисбати соли гузашта 45,9 дарсад зиёд шудааст. Дар ин бора зимни нишасти матбуотии Кумитаи давлатии сармоягузории Тоҷикистон эълон шуд.

Дар идома зикр гардид, ки дар нимсолаи аввали соли ҷорӣ воридоти сармояи мустақими хориҷӣ ба Тоҷикистон ба 153,9 млн доллар расид, ба 112,6 дарсад баробар шудааст.

Аз сӯи дигар дар ин муддат ҷиҳати ҷалби сармояи мустақими хориҷӣ 3 созишномаи нави сармоягузорӣ ба маблағи умумии 2 миллиарду 16 миллион доллар барои бунёди корхонаҳои истеҳсолӣ дар Тоҷикистон ба имзо расид.

Ҳамзамон барои имзои боз 8 созишномаи сармоягузорӣ ба маблағи умумии 505 млн доллар корбарӣ мешавад.

Гуфта мешавад, ки айни замон дар Тоҷикистон 88 лоиҳаи сармоягузории давлатӣ бо ҳазинаи наздики 50 млрд сомонӣ амалӣ мешавад.

Дар таркиби лоиҳаҳои сармоягузорӣ маблағи кумакҳои молӣ ё худ грантҳо ба 33,6 млрд сомонӣ ё 68 дарсад баробар аст. Саҳми ҳукумати Тоҷикистон бошад дар лоиҳаҳои сармоягузорӣ ба 1,4 млрд сомонӣ баробар аст.

Инчунин, дар ин давра бо шарикони рушд созишномаҳои қарзию гранти нав барои татбиқи 8 лоиҳаи сармоягузории давлатӣ ба маблағи умумии 460 млн доллар ба имзо расидааст.

Дар телеграм моро пайгирӣ кунед!
https://t.me/halvaTJnews